Atyraýda 1,5 myńǵa jýyq tutynýshynyń quqyǵy buzylǵan
ATYRAÝ. KAZINFORM – Atyraý oblysynda bıyl tutynýshylardyń quqyqtaryn qorǵaý departamentine 1477 adam júgindi. Mamandar 788 tutynýshynyń máselesin sheshýge kómektesken.
Atyraý oblystyq saýda jáne tutynýshylardyń quqyqtaryn qorǵaý departamentine osy jyldyń basynan beri 1477 azamattan shaǵym túsken. Onyń ishinde 788 tutynýshynyń máselesi oń sheshimin tapsa, 419 ótinish boıynsha kásipkerlerge túsindirý jumystary júrgizilgen.
Departament mamandarynyń málimetinshe, turǵyndar kóbine óz quqyqtaryn tolyq bilmegendikten qıyndyqqa tap bolady. Ásirese, aldyn ala tólem jasaýǵa baılanysty daý-damaılar jıi kezdesedi.
— Qyzmet kórsetilmese nemese taýar berilmese, tutynýshy shartty buzyp, aldyn ala tólegen qarajatyn qaıtarýdy talap etýge quqyly, — deıdi Atyraý oblystyq saýda jáne tutynýshylardyń quqyqtaryn qorǵaý departamentiniń bas mamany Gúlaıhan Nursultanova.
Mamannyń aıtýynsha, mundaı jaǵdaılardyń biri bıyl maýsym aıynda tirkelgen. Atyraý qalasynyń turǵyny merekelik keshke kóılek jalǵa alý úshin aldyn ala avans tólegen. Alaıda keshtiń ótpeı qalýyna baılanysty qyzmet kórsetilmegen. Tutynýshy aqshasyn qaıtarýdy suraǵanymen, kásipker bastapqyda odan bas tartqan.
Keıin turǵyn departamentke júginip, keńes alǵan. Mamandar kásipkerdiń atyna narazylyq hat joldaýdy usynǵan. Sonyń nátıjesinde kásipker shartty buzyp, aldyn ala tólengen qarajatty tolyq qaıtarǵan.
Departament ókilderiniń málimetinshe, aldyn ala tólemge qatysty shaǵymdardyń shamamen 90 paıyzy narazylyq hat joldaý arqyly sheshiledi. Ol úshin tutynýshy kásipkerge óz talabyn jazbasha túrde jetkizýi qajet. Eger kásipker 10 kún ishinde jaýap bermese nemese talapty oryndamasa, azamattar tıisti qujattar men dálelderdi jınap, departamentke qaıta júgine alady.
Buǵan deıin Astanada tutynýshylardan túsken shaǵymdar 55 paıyzǵa kóbeıgenin jazǵan edik.
