Atyraýda 15-qabattyń balkonynan sekirýge oqtalǵan áıel qutqaryldy

Atyraýda 28 jastaǵy áıel 15-qabattyń balkonynan sekirýge oqtaldy. Ony polıtsııa qyzmetkerleri qutqaryp qaldy, dep habarlaıdy Kazinform. 

Oblystyq polıtsııa departamentiniń baspasóz qyzmetinen málim etkendeı, oqıǵa búgin, 31 qazanda bolǵan.

«Atyraý qalasynyń 28 jastaǵy turǵyny «Almagúl» shaǵyn aýdanynda ornalasqan turǵyn úıdiń 15-qabatyndaǵy balkonynan sekirýge oqtaldy. Bul týraly turǵyndardan jergilikti ýaqytpen saǵat 14:21 shamasynda 102-arnasyna habar tústi. Qalalyq polıtsııa basqarmasy jedel basqarý ortalyǵynyń qyzmetkerleri beınebaqylaý kamerasy arqyly oqys qadam jasaǵaly turǵan áıel týraly aqparatty patrýldik polıtsııa qyzmetkerlerine baǵyttama berdi», - dep habarlady departamenttiń baspasóz qyzmeti.

Patrýldik polıtsııa batalony qyzmetkerleri Aıan Sansyzbaev pen Ilıas Qobdabaev oqıǵa ornynan jedel jetip, 28 jastaǵy áıelmen profılaktıkalyq suhbat júrgizgen. Sodan soń shuǵyl qutqarý áreketine kóshken.

«Belgili bolǵandaı, 1995 jylǵy áıeldiń jeke ómirinde túrli qıyndyq týyndaǵan. Ol sol sebepten joǵarǵy qabattaǵy balkonnan sekirýge oqtalǵan. Qazir ol jedel-tergeý tobyna tapsyryldy», - dep málim etti departamenttiń baspasóz qyzmetinen.

Eske sala ketelik, buǵan deıin Atyraýda qarııa 5-qabattaǵy terezeden sekirmek bolǵanyn habarlaǵan edik.

Zeınet jasyndaǵy qarııa «Avangard» shaǵynaýdanynda ornalasqan kópqabatty turǵyn úıdiń 5-qabatynan sekirmek bolǵan. Ony oqıǵa ornyna jedel jetken patrýldik polıtsııa batalonynyń qyzmetkerleri Qadirbek Qýatov, Álı Qadyrov pen ýchaskelik polıtsııa ınspektory Ánýar Quspanov qutqaryp qaldy.