Atyraýda 15 emhanaǵa jasandy ıntellekt negizindegi júıe engizildi
ASTANA. KAZINFORM — Atyraý oblysynyń 15 emhanasy men alǵashqy medıtsınalyq-sanıtarııalyq kómek uıymynda jasandy ıntellekt negizindegi «Akylmed AI» biryńǵaı medıtsınalyq kommýnıkatsııalar júıesi iske qosyldy, dep habarlaıdy oblys ákimdiginiń baspasóz qyzmeti.
№ 6 qalalyq emhanada jańa júıe 37 myńnan astam patsıentti qamtyp úlgerdi.
Atyraý oblysynyń ákimi Bolat Aqsholaqov tsıfrlyq platformanyń jumysymen tanysty.
«Ásel» vırtýaldy operatory táýlik boıy jumys isteıdi. «Damumed» medıtsınalyq aqparattyq júıesimen ıntegratsııalanǵan júıe patsıentterdiń dárigerge jazylýyna kómektesip, anyqtamalyq suraqtarǵa jaýap beredi. Qabyldaýǵa jazylý mamandardyń kestesine saı júrgiziledi, dáriger patsıent týraly málimetti birden kóre alady.
Buǵan qosa, júıe turǵyndardy skrınıngke, vaktsınatsııaǵa jáne flıýorografııaǵa shaqyrady, saqtandyrylmaǵan azamattarǵa MÁMS máseleleri boıynsha aqparat beredi. Sondaı-aq qyzmet kórsetý sapasyna qatysty saýalnamalar júrgizedi, shaǵymdardy qabyldap, onyń qaralý merzimin baqylaýǵa múmkindik beredi. Bul emhanalarǵa halyqty profılaktıkalyq tekserýlerge belsendirek tartýǵa kómektesedi.
№ 6 emhanada JI negizindegi ózine-ózi qyzmet kórsetý termınaly da bar. Turǵyndar onyń kómegimen aqparat alyp, keıbir máselelerdi tirkeý bólimine barmaı-aq ózi sheshe alady. Bul qyzmetkerlerdiń júktemesin azaıtyp, jekeleı qatysýdy qajet etetin ótinishterge meılinshe kóbirek kóńil bólýge jaǵdaı jasaıdy.
Densaýlyq saqtaý basqarmasy júıege qosylǵan barlyq medıtsınalyq uıym boıynsha jıyntyq taldaýdy kóre alady. Keıin ótinishterdi, emhanalardaǵy kezek pen júktemeni jedel baqylaýǵa alý maqsatynda derekterdi sıtýatsııalyq ortalyqqa qosý josparlanyp otyr.
Atyraý oblysy — JI negizindegi biryńǵaı medıtsınalyq kommýnıkatsııa júıeni ortalyqtandyrylǵan formatta engizgen eldegi alǵashqy óńir. Joba Qazaqstan Respýblıkasynyń Prezıdenti Qasym-Jomart Toqaevtyń ekonomıka men áleýmettik salanyń barlyq baǵytyna, sonyń ishinde densaýlyq saqtaý salasyna jappaı JI engizý týraly tapsyrmasyn oryndaý sheńberinde iske asty.
Kelesi kezeńde patsıentterge arnalǵan tsıfrlyq servısterdi damytý qolǵa alynbaq. Oblys ákimi bul oraıda turǵyndarǵa qolaıly ýaqytta óz betimen dáriger qabyldaýyna jazylýǵa múmkindik beretin mobıldi qosymsha ázirleýdi tapsyrdy. Ol platforma patsıent qabyldaýǵa kelmes buryn onyń shaǵymy men aýrý belgileri jaıynda málimet jınaý úshin de qoldanylmaq. Bul dárigerdiń bastapqy anamnez jınaý ýaqytyn qysqartýǵa múmkindik beredi. Budan bólek, paıdalanýshynyń engizgen derekterine qaraı qosymsha aqparat pen aldyn ala usynystar da beriledi.
Tsıfrlyq sheshimder naqty nátıje kórsetip, dárigerlerdiń jumysyn jeńildetip, medıtsınalyq qyzmetterdi azamattarǵa qolaıly ete túsýi kerek. Endigi qadam — patsıentke mobıldi qosymsha arqyly qabyldaýǵa ózi jazylýǵa múmkindik berý. Bul oraıda qupııalylyq pen derekterdi qorǵaý mindetti shart bolýy tıis, — dep atap ótti Bolat Aqsholaqov.
