Atyraýda 13,6 mlrd teńge bólingen 7 turǵyn úıdiń qurylysy áli bitpeı tur
ATYRAÝ. KAZINFORM - Atyraý qalasynyń mańyndaǵy Talǵaırań eldi mekeninde 7 turǵyn úıdiń qurylysy áli bitpeı tur. Turǵyn úı qurylysy bir jyl buryn toqtap qalǵan.
Sybaılas jemqorlyqqa qarsy is-qımyl agenttigi Atyraý oblystyq departamentiniń baspasóz qyzmetinen málim etkendeı, qurylystyń toqtaýyna eki jaıt sebep bolǵan.
Onyń birinshisi — merdigerdiń kelisimsharttaǵy mindettemelerin júıeli, ýaqtyly oryndamaýy; ekinshisi — qurylys materıaldarynyń qymbattaýy.
«Oblystyq qurylys basqarmasynyń mamandarymen, merdigermen jáne eriktilermen birge Talǵaırań eldi mekenindegi qurylysy bir jyl buryn toqtatylǵan 9 qabatty 90 páterlik jeti turǵyn úıdiń, sondaı-aq, sý qubyry men káriz jelisiniń qurylys barysyna monıtorıng jasady. Atyraý qalalyq ákimdiginiń qurylys bólimi turǵyn úılerdiń qurylysyn júrgizý úshin «Taraz Qurylys Invest» kompanııasymen 13,6 mlrd teńgege shart jasaǵan. Ár úı úshin 1,9 mlrd teńge bólingen. Osy kezge deıin 3,6 mlrd teńge ıgerildi», - dep habarlady departamenttiń baspasóz qyzmeti.
Jergilikti departament sybaılas jemqorlyq táýekelderiniń kartasyn iske asyrý sheńberinde turǵyn úıler qurylysyn baqylaýǵa alǵan. Maqsat — qurylys nysandary boıynsha bıýdjet qarajatynyń jumsalýyn qadaǵalaý.
«Antıkor oblys ákimimen birlesip, buzýshylyqtardy joıý jáne problemalyq nysandardyń qurylysyn aıaqtaý josparyn bekitti. Qurylys jumystaryn 2024 jyldyń ekinshi jartyjyldyǵynda aıaqtaý kózdelgen», - dep málim etti departamenttiń baspasóz qyzmeti.
Eske sala ketelik, buǵan deıin Atyraýda 7 jyldan beri salynbaı turǵan mádenıet úıiniń qurylysy qaıta jandanatynyn habarlaǵan edik.
