Atyraýda 13 jastaǵy bala basketbol zalynda kóz jumdy
ATYRAÝ.KAZINFORM - Atyraýdaǵy zaldardyń birinde 13 jastaǵy bala esinen tanyp, qaıtys boldy. Bul aqparatty Atyraý oblystyq bilim berý basqarmasy rastady.
Jasóspirim jedel-járdem qyzmeti jetkenshe kóz jumǵan. Ol AiRom basketbol akademııasynyń tárbıelenýshisi bolǵan.
- Trenerlik quram dereý alǵashqy medıtsınalyq kómek kórsetti, jedel járdem shaqyryldy jáne ata-analary habardar etildi. Medıtsınalyq brıgada qysqa ýaqytta keldi. Anyqtalǵandaı, kámeletke tolmaǵan bala 2024 jyldan bastap kórsetilgen sport zalynda turaqty túrde sabaqqa qatysyp kelgen. 2025 jylǵy 9 qazanda berilgen №027/ý medıtsınalyq anyqtamaǵa sáıkes, oǵan basketbolmen shuǵyldanýǵa ruqsat berilgen, qarsy kórsetilimder bolmaǵan. Jattyǵý sabaqtary shtattyq rejımde, qoldanystaǵy vaýcherlik qarjylandyrý sheńberinde júrgizilgen, - dep habarlady oblystyq bilim berý basqarmasynyń baspasóz qyzmeti.
Basqarmanyń bergen resmı aqparatyna súıensek, Atyraý qalalyq polıtsııa basqarmasy qylmystyq is qozǵaǵan, sotqa deıingi tergep-tekserý amaldary júrgizilip jatyr.
Eske salaıyq, osyǵan deıin Túrkistan oblysynda bir otbasynyń úsh adamy ıis tıip qaıtys bolǵanyn jazǵan edik.