Atyraýda 13 bala ýlanǵan akvaparktiń ıesine 1,8 mln teńge aıyppul salyndy

ATYRAÝ. KAZINFORM — Atyraýda akvaparktiń ıesi 1,8 mln teńge aıyppul arqalady

Jeltoqsan aıynda jeke kásipkerge qatysty qozǵalǵan qylmystyq is boıynsha tergeý áreketteri toqtatylyp, is Atyraý qalalyq ákimshilik quqyq buzýshylyqtar jónindegi mamandandyrylǵan sotyna joldanǵan. Bul týraly qalalyq sanıtarııalyq-epıdemıologııalyq baqylaý basqarmasynyń ókili málimdedi.

Arada 5 aı ótken soń, kópshilikti alańdatqan jaǵdaıǵa qatysty tekseristiń qorytyndysy shyqty. Nátıjesinde basseınderden alynǵan 12 synamaǵa júrgizilgen bakterıologııalyq jáne sanıtarlyq hımııalyq taldaýlarda sýdaǵy hlor mólsheriniń normatıvtik kórsetkishten 2,5 ese joǵary bolǵan.

— Qazir kórsetilgen mekemege qatysty qozǵalǵan qylmystyq is boıynsha tergeý áreketteri toqtatylyp, odan ári halyqtyń sanıtarııalyq-epıdemıologııalyq salamattylyǵy salasyndaǵy is sharalar júrgizildi. Akvaparkterdegi sýlardan synamalar alynyp, bakterıologııalyq, vırýsologııalyq, sanıtarııalyq-hımııalyq kórsetkishterge tapsyryldy. Nátıjesinde bakterıologııalyq, sanıtarııalyq-hımııalyq taldaýlardan hlordyń joǵary shamadan tys ekeni anyqtaldy, — dedi Atyraý qalalyq sanıtarııalyq-epıdemıologııalyq baqylaý basqarmasy bóliminiń basshysy Qalamqas Amanjolova.

Eske sala keteıik, shilde aıynda jekemenshik akvaparkterdiń birinde 13 bala hlor býyna ýlanyp, zardap shekti. Tekseris barysynda atalǵan akvapark sanıtarııalyq-epıdemıologııalyq qorytyndysyz jáne zań talaptaryna saı ruqsat qujattarynsyz jumys istegeni belgili boldy.

Biz osyǵan deıin Atyraý akvaparkinde balalardyń ýlaný isi boıynsha qylmystyq istiń jabylǵany jóninde jazǵan edik.