Atyraýda 11 jyldan beri paıdalanylmaǵan jeri telimi májbúrlep alynady

ATYRAÝ. KAZINFORM – Atyraýda JShS 2014 jyldan beri jer telimin ıelenip kelgen. Eki jyl buryn JShS-ǵa jer zańnamasynyń buzylýyn joıý týraly uıǵarym shyǵarylǵan.

Joǵarǵy sottyń málimetinshe, bir jyldan keıin qaıtadan júrgizilgen tekserý kezinde jer teliminiń ıgerilmegeni anyqtalǵan. Osyǵan baılanysty birinshi satydaǵy sot Atyraý oblysy boıynsha jer resýrstaryn basqarý jónindegi departamentiniń menshik ıesinen maqsaty boıynsha paıdalanylmaı jatqan jer telimin májbúrlep alyp qoıý týraly talap qoıýyn qanaǵattandyrǵan.

– Alaıda, apellıatsııa JShS-nyń uıǵarymdy oryndaý (jobalaý-qurylys jumystaryn júrgizýge shart jasaý jáne sáýlet-josparlaý tapsyrmasyn kelisý) boıynsha sharalar qabyldaǵanyn alǵa tartyp, bul sheshimniń kúshin joıǵan. Biraq bul sharalar jer telimin ıgerýdiń bastapqy bóligi bolyp tabylady. Jer kodeksiniń 94-babynda jer ýchaskesin nysanaly maqsaty boıynsha paıdalaný sharalaryn qabyldaý úshin bir jyl merzim kózdelgeni eskerilip, bul sharalar is júzinde uıǵarym shyǵarylǵanǵa deıin qabyldanýy tıis, - dep habarlady Joǵarǵy sottan.

Joǵarǵy sottyń azamattyq ister jónindegi sot alqasy zerdeleý kezinde mynadaı jaıtqa nazar aýdardy. Birinshiden, eger jobalyq-smetalyq qujattamada basqa merzim kózdelmese jáne ýchaske jeke turǵyn úı qurylysyna arnalmaǵan bolsa, jer ýchaskesin ıgerý ony bólý týraly sheshim qabyldanǵan kúnnen bastap 3 jyl ishinde júzege asyrylýy tıis. Ekinshiden, shart jasasý jáne qujattamany bekitý ýchaskeni ázirlengen dep taný úshin jetkilikti negiz bola almaıdy. Úshinshiden, jer ýchaskesinde is júzinde ony ıgerý úshin qurylys bastalmaǵan. Bul Jer kodeksiniń 92-babynyń talaptaryna qaıshy keledi.

Sol sebepten Joǵarǵy sot maqsaty boıynsha paıdalanylmaı jatqan jer ýchaskesin májbúrlep alyp qoıý isi boıynsha birinshi satydaǵy sottyń sheshimin qalpyna keltirdi.

Eske sala ketelik, budan buryn Atyraýda suıytylǵan munaı gazyn saqtaıtyn kompanııa negizsiz kiris tapqanyn jazǵan bolatynbyz.