Atyraýda 11 jyl buryn bastalǵan farmatsevtıkalyq zaýyt qurylysy sol kúıi toqtap tur
ATYRAÝ. KAZINFORM — Atyraýda 2014 jyly túrli dertke daýa túrli dári-dármek shyǵaratyn farmatsevtıkalyq zaýyttyń qurylysy bastalǵan edi. Sodan beri 11 jyl ótkenimen, atalǵan nysannyń qurylysy aıaqtalǵan joq.
Atyraý oblysynyń sol kezdegi ákimi Baqtyqoja Іzmuhambetov farmatsevtıkalyq zaýyttyń jobalyq quny 3 mlrd 700 mıllıon teńgeni quraıtynyn aıtqan edi.
Jobany iske asyrýǵa «Lumpan Caspian Pharmaceutical LLP» JShS bastamashy bolǵan.
Atalǵan jobaǵa birneshe kompanııa qatysqan. Bul — «Medıtsına» AQ, «Atyraý» ÁKK» AQ, «SAVA Helskeır», «Laıflaın Fze», «ALIM COM» kompanııalary.
Zaýytta 180 adamdy turaqty jumyspen qamtý kózdeldi.
Jylyna 800 mln tabletka, 300 mln kapsýla men 78 mln ampýla túrindegi dári, 3 mln qoraptaǵy jaqpa maı, 12 mln plastıkalyq qutydaǵy eritindi sekildi 50-den astam farmatsevtıkalyq dári-dármek shyǵarý josparlanǵan.
— Dári-dármek ónimderin shyǵarýǵa qajet shıkizat Úndistan men Qytaıdan ákelinedi. Zaýyt iske qosylǵan soń ekologııalyq taza ári sapaly ónim G.M.P. standartyna sáıkes shyǵarylady, — degen edi Baqtyqoja Іzmuhambetov.
«Atyraý» áleýmettik-kásipkerlik korporatsııasy» AQ ınvestıtsııalyq jobalardy iske asyrý departamentiniń dırektory Erulan Bısenovtiń málimetinshe, jobanyń quny — 60 mln AQSh dollary.
Alaıda qarjynyń maqsatsyz jumsalýyna baılanysty kásiporynnyń jumysy toqtap, birjola jabylǵan.
— «Atyraý» áleýmettik-kásipkerlik korporatsııasynan medıtsınalyq qural-jabdyq alý úshin 1 mlrd 42,6 mln teńge kóleminde zaım berildi. Degenmen 2017 jyly sybaılas jemqorlyqqa qarsy is-qımyl ulttyq bıýrosynyń Atyraý oblystyq departamenti jobany iske asyrý barysyna tekserý júrgizdi. Onyń qorytyndysy sol kezde seriktester tarapynan bıýdjet qarjysyn maqsatsyz jumsaý deregi bolǵanyn anyqtady. Osyǵan baılanysty is sotqa jetip, «Medıtsına» AQ 2018 jyly korporatsııa esepshotyna 60,4 mln teńgeni aýdardy. Bir jyldan soń, 2019 jyly 810 mln teńgeniń múligin qaıtaryp berdi. Osylaısha memleket aldyndaǵy qaryzy tolyq kólemde óteldi, — deıdi Erulan Bısenov.
Onyń aıtýynsha, jergilikti ákimdik tarapynan atalǵan jobaǵa ınvestor izdeý qolǵa alynǵan. Alaıda ázirge ınvestor tabylǵan joq.
Eske sala ketelik, buǵan deıin Atyraýda 6 jyl buryn bastalǵan qalashyq qurylysy áli bitpegenin habarlaǵan edik.
Sondaı-aq Atyraýda 9 jyl buryn ashylǵan toqyma fabrıkasy da istemeı tur.