Atyraýda 1033 moped memlekettik tirkeýden ótti
ATYRAÝ. KAZINFORM — Atyraý oblysynda mopedterdi mindetti memlekettik tirkeý jalǵasyp jatyr. Búginge deıin óńirde 1033 moped esepke qoıylsa, jyl basynan beri olardyń qatysýymen 15 jol-kólik oqıǵasy tirkelip, 22 adam jaraqat alǵan.
Qoldanystaǵy zańnamaǵa sáıkes mopedter mehanıkalyq kólik quraldary sanatyna engizilgen. Osyǵan baılanysty olardy paıdalaný úshin kólik quralyn mindetti túrde tirkep, memlekettik tirkeý nómirin alý qajet. Sondaı-aq moped júrgizýshilerinde «A1», «A» nemese «V» sanatyndaǵy júrgizýshi kýáligi bolýy tıis. Talaptardy oryndamaǵan azamattarǵa ákimshilik jaýapkershilik qarastyrylǵan.
Atyraý oblystyq polıtsııa departamentiniń ÁPB Protsessıngtik ortalyǵynyń basshysy Jeńis Dáýletovtiń aıtýynsha, mopedterdi tirkeý kólik quraldarynyń esebin júrgizýge ǵana emes, jol qozǵalysy qaýipsizdigin kúsheıtýge de yqpal etedi.
— Mopedterdi mindetti tirkeý olardyń zańdy aınalymyn baqylaýǵa múmkindik beredi. Sonymen qatar jol-kólik oqıǵalarynyń aldyn alýǵa jáne quqyq buzýshylyqtardyń sanyn azaıtýǵa kómektesedi, — dedi ol.
Polıtsııa qyzmetkerleri turǵyndardy mopedterin ýaqytyly tirkeýge shaqyryp otyr. Qazir oblys aýmaǵynda profılaktıkalyq jáne reıdtik is-sharalar turaqty júrgizilýde. Tirkeýsiz nemese júrgizýshi kýáliginsiz moped basqarǵan azamattarǵa qatysty zań aıasynda tıisti sharalar qabyldanady.
Qazaqstan Respýblıkasynyń Ákimshilik quqyq buzýshylyq týraly kodeksine sáıkes júrgizýshi kýáliginsiz kólik quralyn basqarǵany úshin 86 500 teńge kóleminde aıyppul qarastyrylǵan.
Aıta keteıik, jyl basynan beri Atyraý oblysynda mopedterdiń qatysýymen 15 jol-kólik oqıǵasy tirkelgen. Sonyń saldarynan 22 adam túrli dene jaraqatyn alǵan.
Buǵan deıin SQO joldarynda bıyl velosıped-moped mingen 4 bala mert bolǵanyn jazǵan edik.
