Atyraýda 101 metr qondyrǵyny tasymaldaý úshin birqatar yqshamaýdanda jaryq sóndiriledi
ATYRAÝ.KAZINFORM — Atyraý qalasyndaǵy birneshe yqshamaýdanda jaryq sóndirilýde. Buǵan qala aýmaǵyndaǵy iri gabarıttik qondyrǵynyń tasymaly sebep.
«Atyraý Jaryq» JShS málimetinshe, búgin «AtyraýNefteMash» zaýytynyń aýmaǵynan Qarabatan kentindegi Silleno qurylys alańyna iri gabarıtti júkti tasymaldaýǵa baılanysty qaýipsizdikti qamtamasyz etý maqsatynda birqatar yqshamaýdanda elektr energııasy ýaqytsha óshirý josparlanǵan. Olar:
* Birlik yqshamaýdany
* Birlik-2 yqshamaýdany
* Tomarly aýyly
* Geolog yqshamaýdany
* Mıras yqshamaýdany
* Munaıshy yqshamaýdany
* Juldyz yqshamaýdany
* Juldyz-3 yqshamaýdany
* Bereke yqshamaýdany
* Vokzal mańy yqshamaýdany — 3, 3a, 5
* SMP-163
* Atyraý — Dossor tas joly
* G. Berǵalıev kóshesi
* M. Baımuhanov kóshesi
— Óshirý jumystary personaldyń jáne iri gabarıtti júkti tasymaldaýdyń qaýipsizdigin qamtamasyz etý maqsatynda júrgiziledi. Ýaqytsha týyndaǵan qolaısyzdyqtar úshin keshirim suraımyz jáne túsinistik tanytqandaryńyzǵa alǵys bildiremiz, -delingen Atyraý Jaryq JShS habarlamasynda.
Aıta keteıik, tok kózi arnaıy baǵana júrip ótken aýmaqtarda kezeń-kezeńimen berilip jatyr.
Tasymaldanyp jatqan etılendi bólý baǵanasynyń bıiktigi — 101,8 metr (30 qabatty turǵyn úıden bıik), dıametri — 7,5 metr, salmaǵy — shamamen 1,5 myń tonna. Bul qondyrǵy polıetılen óndiretin zaýyttyń negizgi qondyrǵylarynyń biri.
— Іri gabarıtti jabdyqty tasymaldaý úshin óske salmaqtyń birkelki túsýin qamtamasyz etetin arnaıy ózdiginen júretin modýldik tasymaldaǵysh paıdalanylady. Mundaı ınjenerlik sheshim óske júktemeni ruqsat etilgen shekterde ustap, jol jabynynyń búlinýine jol bermeıdi. Tasymaldaý qaýipsizdik talaptaryn saqtaı otyryp, kúndizgi ýaqytta shamamen bir apta boıy (saǵatyna 2–4 shaqyrym jyldamdyqpen) júzege asyrylady, — dep málimdedi zaýyttyń baspasóz qyzmeti.
Arnaıy tehnıkanyń kedergisiz qozǵalysyn qamtamasyz etý úshin marshrýt boıynda jol qozǵalysyn ýaqytsha shekteý, jol qurylystaryn kúsheıtý jáne aınalma baǵyttardy uıymdastyrý sharalary qarastyrylǵan.
Buǵan deıin Shymkentte apat saldarynan birneshe shaǵynaýdanda jaryq pen gaz óship qalǵanyn jazǵan edik.
