Atyraýda 1000-ǵa jýyq jas «ATYRAU VOLUNTEER FEST» festıvaline qatysty
ATYRAÝ. KAZINFORM — Atyraý qalasynda «ATYRAU VOLUNTEER FEST» eriktiler festıvali ótip jatyr. Aýqymdy is-sharaǵa óńirdiń 1000-ǵa jýyq volonteri men belsendi jastary, sondaı-aq halyqaralyq jáne otandyq uıym ókilderi jınaldy, dep habarlaıdy oblys ákimdiginiń baspasóz qyzmeti.
Festıvaldiń basty erekshelikteriniń biri — spıkerlermen ashyq formattaǵy kezdesýler. Kúni boıy túrli sala mamandary men qoǵam ókilderi jastarmen tájirıbe almasyp, ózekti taqyryptardy talqylap jatyr.
Alǵashqy sessııada BUU Balalar qory (UNICEF) jastarmen jumys koordınatory Sharbaný Nurǵazy jáne qoǵam belsendisi, IT-kásipker Alpamys Jarılkasınov sóz sóıledi. Spıkerler volonterliktiń jahandyq deńgeıde damyp, jastardyń kóshbasshylyq qabileti men azamattyq jaýapkershiligin qalyptastyrýǵa yqpal etetinin atap ótti.
Kelesi kezdesýde BUU Eriktiler baǵdarlamasynyń TMD elderi boıynsha seriktestik mamany Nuraı Mamytova, «Jastar Rýhy» jastar qanatynyń tóraǵasy Aqerke Nurǵalıqyzy jáne kınorejısser, jýrnalıst Álııa Áshim qatysyp, jastarǵa jergilikti jáne halyqaralyq deńgeıdegi volonterlikke qatysý múmkindikteri bar ekeni, onyń tájirıbe jınaý men kásibı damýǵa jol ashatynyn aıtty.
Іs-sharada oblys ákiminiń orynbasary Daryn Shamuratov aldaǵy ýaqytta da volonterlik bastamalardy qoldap, aýqymyn keńeıtýge kúsh salatynyn aıtty.
— Búginde Atyraý oblysynda volonterlik qozǵalys júıeli túrde damyp keledi. Óńirde myńǵa jýyq erikti jas pen 150-den astam kúmis volonter, 30 úkimettik emes uıym tirkelgen, onyń 12-si belsendi. Budan bólek, 4 bastamashyl top jumys jasap jatyr. Bul jastardyń qoǵam ómirine belsendi aralasyp, áleýmettik jaýapkershilikti sezinetinin kórsetedi, — dedi D. Shamuratov.
Keshki sessııaǵa Ulttyq volonterlik jelisiniń front-ofıs basshysy Aıbek Dosymbetov pen psıhofızıolog, neıropsıholog Abdrashıt Túlkibaıdyń qatysty.
Festıval aıasynda halyqaralyq jáne jergilikti 15-ke jýyq uıym óz qyzmetin kórme formatynda tanystyryp jatyr. Qatysýshylar ekologııa, medıtsına, áleýmettik kómek, tótenshe jaǵdaılar jáne janýarlarǵa qoldaý kórsetý baǵyttaryndaǵy jobalarmen tanysady.
Festıval keshki saǵat 22:00–ge deıin jalǵasyp, gala-kontsertpen qorytyndylanady. Keshtiń hedlaıneri — tanymal oryndaýshy ARO.
Іs-shara Atyraý oblysy Іshki saıasat basqarmasynyń qoldaýymen «Jastar Rýhy» jastar qanatynyń oblystyq fılıalynyń uıymdastyrýymen ótip jatyr.
