Atyraýda 100-den asa adamdy aldaǵan avtosalon basshylary sottaldy
ATYRAÝ. KAZINFORM – Atyraýda «Abyroı Avto» avtosalonynyń eki basshysy 6 jyl 6 aıǵa bas bostandyǵynan aıyryldy. Sot olardy alaıaqtyq jasaǵany úshin kináli dep tanyp, jábirlenýshilerge 1 mlrd 147 mln teńgeden astam shyǵyndy óteýge mindettedi.
Atyraý qalalyq №2 soty aıyptalýshylardy QR Qylmystyq kodeksiniń 190-babynyń 4-bóligi, 2-tarmaǵy boıynsha, ıaǵnı alaıaqtyq jasaǵany úshin kináli dep tanydy.
Sot úkimimen olardyń árqaısysyna kommertsııalyq uıymdar men ózge de kásiporyndar qurýǵa, olarda basshylyq etýge jáne materıaldyq jaýapkershilikke baılanysty laýazymdardy atqarýǵa 6 jyl merzimge tyıym salynǵan. Negizgi jaza retinde 6 jyl 6 aıǵa bas bostandyǵynan aıyrý taǵaıyndaldy.
- Jazany qylmystyq-atqarý júıesiniń qaýipsizdigi ortasha mekemesinde óteý belgilendi. Jaza óteý merzimi 2026 jylǵy 1 qazannan bastap esepteledi», – dedi Atyraý qalalyq №2 sotynyń sýdıasy Elmıra Oıkýlova.
Eki sottalýshynyń ýaqytsha ustaý ızolıatorynda otyrǵan ár kúni jazany óteý kezinde 1,5 kún bolyp esepteledi.
Sot otyrysy segiz aıǵa sozylǵan. Іs boıynsha 103 jábirlenýshi men 100-den astam kýágerdiń jaýaby tyńdalǵan. Memlekettik aıyptaýshy Abylaıhan Abýjanovtyń aıtýynsha, avtosalon ókilderi azamattardyń senimine kirip, olarǵa túrli usynyspen shyǵyp, olardyń kólikterin satyp alýǵa kelisken. Keıin jábirlenýshilerge kólikterin avtosalonǵa rásimdep, 10 jumys kúni ishinde aqshasyn alatyny túsindirilgen. Alaıda tergeý barysynda kólikterdiń jábirlenýshilerdiń atynan avtosalon qyzmetkerleri nemese úshinshi tulǵalardyń atyna rásimdelgeni anyqtalǵan. Keıin kólikter basqa adamdarǵa satylǵan.
- Jábirlenýshilerge kólikterin satyp alatynyn aıtyp, arnaıy shaqyrǵan. Kelisimshart jasalǵan kezde kólik jábirlenýshiniń atynan shyǵarylyp, avtosalon qyzmetkerleriniń nemese úshinshi tulǵalardyń atyna rásimdelgen. Keıin avtokólikter basqa adamdarǵa satylǵan. Biraq jábirlenýshilerge aqsha da, kólik te berilmegen, – dedi memlekettik aıyptaýshy.
Sot materıaldaryna sáıkes, jábirlenýshilerge keltirilgen zalal kólemi 1 mlrd 147 mln 800 myń teńge bolǵan.
Bul alaıaqtyq shema týraly bir jyl buryn belgili boldy. Byltyr tamyzda «Abyroı Avto» avtosalonynyń qyzmetine baılanysty 100-den astam azamat polıtsııaǵa shaǵym jazǵan. Jábirlenýshilerdiń aıtýynsha, avtokólikteriniń quny 7 mln-nan 30 mln teńgege deıin bolǵan.
Sot úkimi ázirge zańdy kúshine engen joq.
Buǵan deıin Astana qalasynda Instagram jáne TikTok áleýmettik jelilerinde qumar oıyn uıymdastyrǵan eki adamnan zańsyz jolmen alynǵan 124,8 mln teńgeden astam aqsha óndirilgenin jazǵan edik.
