Atyraýda qujaty joq 10 jasar bala polıtsııa kómegimen mektepke qabyldandy
ASTANA. KAZINFORM — Atyraýda ata-anasymen birge sharýa qojalyǵynda turǵan 10 jastaǵy balaǵa týý týraly kýálik berilip, mektepke ornalastyryldy, dep habarlaıdy ІІM baspasóz qyzmeti.
Respýblıkalyq «Ýchaske» jedel profılaktıkalyq is-sharasy aıasynda Atyraý oblystyq polıtsııa departamentiniń Inder aýdandyq polıtsııa bóliminiń ýchaskelik ınspektorlary Eltaı aýylyna qarasty Baǵyrlaı kanaly boıyndaǵy bir sharýa qojalyǵyn tekserý barysynda zańbuzýshylyq deregin anyqtady.
Tekserý kezinde bul sharýashylyqta erli-zaıypty azamattardyń 2025 jyldyń sáýir aıynan beri kómekshi retinde jumys istep júrgeni belgili boldy. Sonymen birge olardyń 10 jastaǵy ulynda jeke basyn kýálandyratyn qujat — týý týraly kýálik joq ekeni, ári osy ýaqytqa deıin mektepte bilim almaǵany anyqtaldy. Anasynyń aıtýynsha, bala Qyzylqoǵa aýdanyna qarasty Qonystaný eldi mekeninde dúnıege kelgen.
Alaıda olardyń turǵylyqty mekenjaıy Aqtaý qalasynda tirkeýde turǵandyqtan, qujatty ýaqytyly rásimdeý múmkin bolmaǵan. Degenmen, bala bir jasqa deıin qajetti medıtsınalyq ekpelerin alǵan. Keıin otbasy turmystyq jaǵdaıyna baılanysty Inder aýdanyna qonys aýdarǵan. Atalǵan derek tirkelgennen keıin ýchaskelik ınspektorlar balanyń quqyqtaryn qorǵaý maqsatynda tıisti memlekettik organdarmen birlesip sharalar qabyldady.
— Nátıjesinde jasóspirimge týý týraly kýálik resimdelip, onyń bilim alý quqyǵyn qamtamasyz etý úshin aýdandyq mektep-ınternatyna ornalastyryldy. Sonymen qatar ata-anasyna QR ÁQBtK-niń 127-baby — kámeletke tolmaǵan balany tárbıeleý, bilim berý jáne onyń quqyqtary men qaýipsizdigin qamtamasyz etý jónindegi mindetterdi oryndamaý deregi boıynsha ákimshilik is qozǵalyp, zań talaptaryna sáıkes shara qoldanyldy, — delingen habarlamada.
Budan buryn Almatyda 20 jyl qujatsyz júrgen zeınetker jeke kýálik alǵany anyqtaldy.