Atyraýda 10 sáýirden beri túnde qydyrǵan 341 jasóspirim polıtsııaǵa jetkizildi

ATYRAÝ. KAZINFORM – Atyraý polıtseıleri 10 sáýirden beri túnde qydyryp júrgen 341 jasóspirimdi ustady. Onyń ishinde 5-eýi qylmys, al 24-i ákimshilik quqyq buzýshylyq  jasaǵan.

Atyraý oblystyq Polıtsııa departamenti jergilikti polıtsııa qyzmeti basqarmasy bastyǵynyń mindetin atqarýshy Abzal Álipqalıevtiń aıtýynsha, 10 sáýirde «Jasóspirim» reıdtik is-sharasy bastalǵan. Bul is-shara 6 mamyrǵa deıin jalǵasady.

– Atalǵan is-sharanyń maqsaty – jasóspirim tarapynan bolýy yqtımal quqyq buzýshylyqtyń, kámelet jasyna tolmaǵandarǵa qarsy jasalýy múmkin qylmystyń aldyn alý. Polıtsııa qyzmetkerleri 10 sáýirden beri túngi mezgilde kóshede júrgen 341 jasóspirimdi ishki ister organdaryna jetkizdi. Onyń ishinde 5 jasóspirimniń qylmys jasaǵany anyqtaldy. Al 24 jasóspirim ákimshilik quqyqbuzýshylyq jasaǵany úshin, 312-si túngi ýaqytta ata-anasynyń qaraýynsyz kóshede júrgeni úshin ustaldy, - dedi Abzal Álipqalıev.

Onyń deregine qaraǵanda, kámeletke tolmaǵandardy ýaqytsha beıimdeý ortalyǵyna 4 jasóspirim ornalastyrylǵan. Іshki ister organdarynyń esebine 3 jasóspirim, 10 jaısyz otbasy alynǵan.

– Bul is-shara kezinde tek quqyq buzýshylyqty anyqtaýmen shektelmeımiz. Jasóspirimderge durys baǵyt-baǵdar berý maqsatyn kózdedik. Óıtkeni ár bala – qoǵamnyń bolashaǵy. Sondyqtan barlyq jaýapty organmen birge jasóspirimderdiń qaýipsizdigi men quqyǵyn qorǵaýdy jalǵastyra beremiz, - dep málim etti Abzal Álipqalıev.

Eske sala ketelik, buǵan deıin Atyraýda jyl basynan beri 100 myńǵa jýyq quqyq buzýshylyq anyqtalǵanyn jazǵan edik.