Atyraýda 10 aıda 81 adam bankrot dep tanylǵan

ATYRAÝ. KAZINFORM – Jyl basynan beri Atyraý qalalyq memlekettik kirister basqarmasyna sottan tys bankrottyq rásimge baılanysty 1 188 adamnan ótinish túsken. Onyń ishinde 10 aıda 81 adam bankrot dep tanylǵan. 

Atyraý qalalyq memlekettik kirister basqarmasy basshysynyń mindetin atqarýshy Aıbol Amanovtyń deregine súıensek, 301 ótinish maquldanyp, bankrot dep taný úshin óndiris bastalǵan.

«Bıyl 10 aıda 81 adam bankrot dep tanyldy. Qazir 220 ótinish qaralyp jatyr. Al 887 adamnyń ótinishi qanaǵattandyrylmady. Óıtkeni, ótinish berýshilerdiń isi zań talaptaryna sáıkes kelmeıdi. Al, bankrottyqty rásimdeý úshin ótinish bergen azamattyń qaryz somasy 1 600 aılyq eseptik kórsetkish mólsherindegi 6,3 mln teńgeden aspaýy tıis. Qaryzdy óteý merziminiń 12 aıdan asqany nemese turaqty tabysynyń bolmaǵany mańyzdy ról atqarady», - deıdi Aıbol Amanov.

Onyń aıtýynsha, azamattardyń bankrot dep tanylýyna birneshe sebep áser etken. 

«Birinshiden, olardyń kópshiliginde turaqty kirisi tómendep, nesıe men qaryz mindettemelerin óteý múmkindiginiń bolmaǵan. Ekinshiden, eńbek naryǵyndaǵy turaqsyzdyq sekildi qıyndyqqa tap bolǵan. Keıbir adamdardyń ótinishteri talaptarǵa saı bolmaǵandyqtan, bankrot dep tanylmaıdy. Olar bas tartý sebepterin joıyp, 3 aı ótken soń bankrottyqqa qaıta ótinish bere alady», - dep málim etti Aıbol Amanov.

Endi bankrot dep tanylǵan 81 adamnyń aldaǵy 5 jyldyqta bankter men mıkroqarjy uıymdarynan nesıe alýyna tyıym salynady. Olardyń qarjylyq jaǵdaıyna 3 jyl boıy monıtorıng júrgiziledi.

Eske sala ketelik, buǵan deıin Atyraý oblysynda 350 adam sottan tys bankrot dep tanylǵanyn habarlaǵan edik. 

Keıin Atyraýda bankrot bolǵysy kelgen 2 792 adamnyń ótinishi qaraýsyz qalǵanyn jazǵan bolatynbyz.