Atyraýda 1 mlrd teńgelik ınvestıtsııalyq jobany iske asyrýǵa zańsyz kedergi jasalǵan
ASTANA. KAZINFORM — Atyraý oblysynda prokýrorlardyń aralasýymen quny 1 mlrd teńge bolatyn ınvestıtsııalyq joba qorǵaldy.
Atyraý oblysy Mamandandyrylǵan tabıǵat qorǵaý prokýratýrasy Investorlardyń quqyqtaryn qorǵaý komıtetiniń yqpaldasýymen quny 1 mlrd teńgeni quraıtyn ınvestıtsııalyq jobany júzege asyrýǵa bóget bolǵan zańsyz kedergilerdi joıdy.
Investor «Adal Gaz Oıl Atyraý» JShS óńirde avtoquıý stantsııasynyń, kempıng ortalyǵynyń jáne qoǵamdyq tamaqtaný obektisiniń qurylysy boıynsha jobany iske asyryp jatyr. Investıtsııa kólemi shamamen 1 mlrd teńgeni quraıdy. Joba iske qosylǵannan keıin 50 jańa jumys orny ashylady. Degenmen, qurylys jobasyn kelisý barysynda ınvestor Jaıyq-Kaspıı basseındik sý resýrstaryn retteý, qorǵaý jáne paıdalaný jónindegi ınspektsııasy tarapynan negizsiz bas tartýlarǵa tap bolǵan. Saldarynan jobanyń iske asyrylýy birneshe aıǵa sozylyp ketken.
— Prokýratýranyń aralasýynan keıin jobany iske asyrýdan zańsyz bas tartý sheshimi joıylyp, ákimshilik kedergiler alynyp tastaldy. Prokýrorlyq qadaǵalaý aktisi boıynsha Inspektsııanyń bólim basshysy tártiptik jaýaptylyqqa tartyldy. Investorlardyń quqyqtaryn qorǵaý jáne ınvestıtsııalyq jobalardy súıemeldeý prokýratýra organdarynyń erekshe baqylaýynda, — delingen habarlamada.
Budan buryn elimizde ınvestıtsııalyq daýlardy sotqa deıin retteýdiń jańa tetigi qurylǵanyn jazdyq.
