Atyraýda 1 myńnan astam kópqabatty turǵyn úıdiń jartysyna ǵana jylý berildi

ATYRAÝ. KAZINFORM – Atyraý qalasynda kópqabatty 1033 turǵyn úı bar. Búginge deıin kópqabatty turǵyn úılerdiń jartysyna ǵana jylý berildi.

Atyraýda jylý saıyn jylý berý 15 qazanda bastalady. Alaıda bıyl qazan aıy bastalǵannan beri aýa raıy qubylyp tur. Sońǵy 3-4 kúnnen kúrt sýytty. Osyǵan baılanysty turǵyndar jylýdyń áli berilmegenine shaǵym aıtyp otyr. Atyraý oblysy energetıkalyq kesheniniń baspasóz qyzmetinen málim etkendeı, 1 qazanda munaıly shahardaǵy áleýmettik nysandarǵa jylý berile bastaǵan.

«Qazan aıynyń alǵashqy kúni oblys ortalyǵyndaǵy áleýmettik nysandardyń bári jylýǵa qosyldy. Onyń ishinde mektepter men balabaqshalar, aýrýhanalar men arnaıy mekemeler bar. Al, 8 qazanda kópqabatty turǵyn úılerge jylý berile bastady. Qazir Atyraý qalasynda ortalyq jylý jelisine qosylǵan qosylǵan 1033 kópqabatty turǵyn úı bar. Búgingi kúnge deıin 517 turǵyn úıge jylý berildi. Endi 516 úıdi jylýmen qamtamasyz etý josparlanyp otyr. Osyǵan baılanysty tıisti jumystar júrgizilip jatyr», - dep habarlady energetıkalyq keshenniń baspasóz qyzmeti.

Baspasóz qyzmetiniń málimetine qaraǵanda, 516 turǵyn úıdi jylýǵa qospaýdyń birneshe sebebi bar.

«Keıbir páter ıeleriniń kooperatıvi tarapynan jylýdy keshirek qosý týraly ótinish tústi. Al keıbirine qarasty turǵyn úılerge jylý berýge daıyn bolmaı shyqty. Osyndaı sebepterge baılanysty 516 turǵyn úı jylýǵa birtindep qosylady», - dep málim etti energetıkalyq keshenniń baspasóz qyzmetinen.

Eske sala ketelik, budan buryn Atyraý oblysynyń jylý berý maýsymyna daıyndyǵy 97 paıyz ekenin habarlaǵan edik.