Atyraý joldarynan jyl basynan beri 471 aqaý anyqtaldy
ATYRAÝ. KAZINFORM – Atyraý oblysynda avtomobıl joldarynyń sapasyna júrgizilgen baqylaý barysynda 471 aqaý men kemshilik anyqtaldy.
«Jol aktıvteri sapasynyń ulttyq ortalyǵy» RMK Atyraý oblystyq fılıalynyń bólim bastyǵy Nurlan Jantýrınniń málimetinshe, jyl basynan beri fılıal mamandary avtomobıl joldary men jol qurylysy salasyndaǵy 130 nysanda 278 tekserý júrgizgen. Nátıjesinde 471 túrli aqaý men kemshilik anyqtalǵan.
– Búginde anyqtalǵan olqylyqtardyń 172-si tolyq joıyldy. Qalǵan aqaýlar boıynsha merdiger uıymdar men tapsyrys berýshilerge tıisti usynymdar men nusqamalar berildi. Barlyq jumystyń oryndalýy turaqty baqylaýda bolady, – dedi Nurlan Jantýrın.
Sonymen qatar jyl basynan beri jol qurylysynda paıdalanylatyn materıaldardyń sapasyna zerthanalyq baqylaý júrgizilip, 770 synama alynǵan. Onyń ishinde respýblıkalyq mańyzy bar avtomobıl joldarynan alynǵan 205 synamanyń 167-si, al jergilikti mańyzy bar joldardan alynǵan 565 synamanyń 413-i qoldanystaǵy memlekettik standart talaptaryna sáıkes kelgen.
Budan bólek, óńirdegi asfaltbeton zaýyttarynyń jumysyna monıtorıng júrgizildi. Barlyǵy 21 zaýyt tekserilip, onyń altaýy belgilengen talaptarǵa tolyq sáıkes ekeni anyqtalǵan. Tórt zaýyt konservatsııa rejıminde tursa, 11 zaýyttyń qoldanystaǵy normatıvtik talaptarǵa sáıkes kelmeıtini belgili bolǵan.
Buǵan deıin Qazaqstan jol ınfraqurylymyn damytýǵa shamamen 1 mlrd dollar tartatynyn jazǵan edik.
