Atyraý jasóspirimderi arasynda quqyq buzýshylyq pen sýıtsıd deregi ósken

ATYRAÝ. KAZINFORM — Byltyr Atyraý oblysynyń bilim salasynda 1 200-den astam quqyq buzýshylyq deregi anyqtalǵan. Ásirese, jasóspirimder arasyndaǵy quqyq buzýshylyq pen sýıtsıd deregi artqan. 

Atyraý oblysynyń úılestirý keńesiniń jıynynda kámeletke tolmaǵan jasóspirimder arasyndaǵy quqyq buzýshylyq máseleleri qaraldy. Oblys prokýrory Baýyrjan Jumaqanovtyń deregine súıensek, jasóspirimder tarapynan jasalatyn quqyq buzýshylyq deregi 21 paıyzǵa (100-den 121-ge) ósken. Onyń ishinde jynystyq tıispeýshilik 38,7% (31-den 43-ke), balalar sýıtsıdi 156,3% (16-dan 41-ge) artyp otyr.

«Barlyq menshik nysanyndaǵy bilim mekemelerine tekserý júrgizilip, 1 200-den astam quqyq buzýshylyq anyqtaldy. Ásirese, qaýipsizdik, qurylys, memlekettik satyp alý, bilim sapasy, sanıtarlyq-epıdemıologııalyq normalar, órt qaýipsizdigi salasynda kemshilikter bar. Ár balanyń qaýipsizdigin qamtamasyz etýimiz qajet. Óıtkeni, basty basymdyqtyń biri — jasóspirimder arasynda quqyq buzýshylyqtyń aldyn alýda quqyqtyq sana men mádenıetti qalyptastyrý», - deıdi Baýyrjan Jumaqanov.

Eske sala ketelik, buǵan deıin Atyraýda 101 jol-kólik oqıǵasynan 16 jasóspirim mert bolǵanyn habarlaǵan edik.