«Atyraý» voleıbol klýby qatarynan ekinshi ret jeńiske jetti

ÓSKEMEN. KAZINFORM — Pavlodar qalasynda voleıboldan erlerdiń ulttyq lıga komandalary arasynda ótip jatqan XXXIII Qazaqstan chempıonatynyń ekinshi týrynda «Atyraý» jeńisti jolyn jalǵastyrdy.

Keshe el chempıony «Tarazdy» 3:2 esebimen tize búktirgen atyraýlyqtar (bas bapkeri Deıan Výlıchevıch) bul joly «Býrevestnıkke» (Almaty) qarsy keldi.

Igor Nıkolchenko jattyqtyratyn almatylyqtar osyǵan deıin «Jetisý», vıtse-chempıon «Pavlodar» jáne «Taraz» komandalarynyń saǵyn syndyrǵan edi.

Bul joly atyraýlyqtar 5 partııaǵa sozylǵan tartysty matchta jeńisti julyp aldy – 3:2 (20:25, 25:17, 28:26, 25:27, 15:13). Oıyn barysynda Nurasyl Jambylov dop berýde úsh eıspen kózge tússe, reseılik Ivan Nıkıshın «Atyraý» sapynda alǵash ret óner kórsetti. 

Taǵy bir osyndaı báseke «Taraz» ben «Esil» (SQO) klýbtarynyń arasynda ótti.

Soltústikqazaqstandyqtar «Tarazdy» súrindirip ketti – 3:2 (23:25, 25:23, 18:25, 25:22, 15:10). 
«Esil» 11 upaımen týrnır kestesinde jetinshi, «Atyraý» (10 upaı) segizinshi orynda keledi.
Alań ıeleri «Pavlodar» kósh sońyndaǵy «Ushqyn-Kókshetaýdyń» meselin qaıyrdy – 3:1 (25:21, 26:24, 21:25, 25:19).

Komandalar sársenbi kúni demalyp, beısenbide qaıta kirisedi. 26 jeltoqsanǵa «Ushqyn-Kókshetaý» - «Taraz», «Esil» - «Býrevestnık», «Jaıyq» - «Jetisý», «Aqtóbe» - «Pavlodar» matchtary belgilengen. 

Oraldyqtar 25 upaımen kósh bastasa, «Jetisý» (24 upaı) ekinshi, «Pavlodar» (22 upaı) úshinshi satyda tur.

Eske sala keteıik, budan buryn voleıboldan el chempıonatynda «Jetisýdyń» aqtóbelikterge ese jibergenin jazǵan bolatynbyz.