Atyraý vokzalyn jańǵyrtý kezinde bıikten qulaǵan jumysshynyń jaǵdaıy aýyr
ATYRAÝ. KAZINFORM — Atyraý qalasyndaǵy temirjol vokzalyn jańǵyrtý kezinde jumysshy aýyr jaraqat aldy. Qazir 42 jastaǵy azamat oblystyq aýrýhananyń jansaqtaý bóliminde jatyr. Dárigerler onyń jaǵdaıyn óte aýyr dep baǵalap otyr.
Aldyn ala málimet boıynsha, jumysshy shamamen 5 metr bıiktikten qulaǵan. Oqys oqıǵa 15 qazanda bolǵan.
Atyraý oblystyq aýrýhanasynyń basshysy Erbol Imanǵalıevtiń aıtýynsha, naýqastyń bas mıy, julyn jáne omyrtqasy zaqymdanǵan. Oǵan qajetti ota jasalǵan.
— Qazir jansaqtaý bóliminde jatyr. Jaǵdaıy óte aýyr. Keshe tıisti ota jasaldy. Qazirgi ýaqytta barlyq qajetti medıtsınalyq kómek kórsetilip jatyr, — dedi Erbol Imanǵalıev.
Oqıǵaǵa baılanysty Atyraý stantsııasyndaǵy kóliktegi polıtsııa bólimi eńbekti qorǵaý qaǵıdalaryn buzý faktisi boıynsha qylmystyq is qozǵady.
— Qazirgi ýaqytta oqıǵanyń barlyq mán-jaıyn anyqtaý maqsatynda qajetti tergeý áreketteri júrgizilýde. QR Qylmystyq-protsestik kodeksiniń 201-babyna sáıkes, ózge aqparat jarııa etýge jatpaıdy, — delingen kóliktegi PD málimdemesinde.
Al eńbek ınspektsııasy jazataıym oqıǵanyń sebepteri men jaǵdaılaryn anyqtaý úshin arnaıy komıssııa qurylatynyn habarlady.
Aıta keteıik, Atyraý qalasyndaǵy temirjol vokzalyn jańǵyrtý jumysyn «Batys Alıans Stroı» kompanııasy júrgizip jatyr.
Buǵan deıin bıyl Pavlodarda óndiristik jaraqattan 11 adam kóz jumǵanyn jazǵan edik.
