Atyraý ýnıversıtetiniń dekany 6 jyl zańsyz jalaqy alyp kelgen
Atyraýdaǵy H. Dosmuhamedov atyndaǵy ýnıversıtettiń dekany shet elderde júrgen kúnderine jalaqy alyp kelgen. Qazir negizsiz tólengen qarjy qaıtarylyp, dekan qyzmetinen bosatyldy, dep habarlaıdy Kazinform.
Bul derek «Ádildik joly» respýblıkalyq qoǵamdyq birlestigi óńirlik fılıaly men Sybaılas jemqorlyqqa qarsy is-qımyl agenttigi Atyraý oblysy boıynsha departamentiniń birlesken tekserýi kezinde anyqtalǵan.
«H. Dosmuhamedov atyndaǵy Atyraý ýnıversıteti ekonomıka jáne quqyq fakýltetiniń dekanyna jalaqyny zańsyz aýdarý faktisi anyqtaldy. 2017 jyldan 2023 jyldyń qyrkúıegine deıin atalǵan dekan jumys kúnderi Ońtústik Koreıa, Túrkııa jáne taǵy basqa elderge birneshe ret barǵan. Alaıda, tabelderge jumys kúnderi retinde qoıylyp, jalpy somasy 1 mln teńgege jýyq tólem júrgizilgen. Kórsetilgen kezeńde dekanǵa 80 jumys kúni ishinde tabelderge aqyly kúnder qoıyldy. Al is júzinde ol jumys ornynda bolmaǵan», – dep habarlady birlestiktiń jergilikti fılıalynan.
Osyǵan oraı H. Dosmuhamedov atyndaǵy Atyraý ýnıversıtetiniń baspasóz qyzmeti túsinik berdi.
«Fakýltet dekany issaparǵa josparlanǵan merzimnen erte ketken nemese kesh kelgen. Sonymen qatar otbasylyq jáne densaýlyq jaǵdaıyna baılanysty jumystan suranǵan kúnderi tabelde eseptelip, aqy tólengeni anyqtaldy. Sondyqtan, onyń qyzmet etken merzimde jumysta bolmaǵan kúnderine tólengen jalaqy tolyqtaı ýnıversıtetke qaıtaryldy. Qyzmettik tártipti buzǵany úshin 2023 jylǵy 20 qazanda dekan laýazymynan bosatyldy. Al 1 qarashadan bastap jumystan shyǵaryldy», – dep habarlady ýnıversıtetten.
Qyzmetine salǵyrttyq tanytyp, zańsyzdyqqa jol bergeni úshin laýazymdy qyzmetkerler tártiptik jaýapkershilikke tartylyp, jumystan shettetilgen.
