Atyraý ýnıversıtetiniń apatty jataqhanasynyń bir bóligi opyrylyp qulady
ATYRAÝ. KAZINFORM — H.Dosmuhamedov atyndaǵy Atyraý ýnıversıtetiniń apatty dep tanylǵan jataqhanasynyń bir bóligi qulap qaldy. Jataqhana búgin, 22 sáýirde qulaǵan. Bul — stýdentter turmaıtyn jataqhana.
Joǵary oqý ornynyń baspasóz qyzmeti jataqhananyń qulap qalǵanyn rastady. Apatty dep tanylǵan № 2 jataqhananyń 5 qabatty ǵımaraty 1972 jyly salynǵan.
— Ýnıversıtettiń sharýashylyq bólimi 2022 jyldyń qarasha aıynda № 2 jataqhanadaǵy 1-qabatynyń qabyrǵasynda aqaýdyń paıda bolǵanyn anyqtady. Osy jaǵdaı anyqtalǵan soń memlekettik satyp alý portaly arqyly jataqhananyń tehnıkalyq qaýipsizdigine saraptama júrgizýge konkýrs jarııalandy. 2023 jylǵy 21 aqpandaǵy № 138 kelisimshartqa sáıkes «PFA compani» JShS tehnıkalyq zerdeleý jumystaryn júrgizip, ǵımarattyń apatty jaǵdaıda ekeni rastaldy. Stýdentterdiń bári basqa jataqhanalarǵa kóshirilip, ornalastyryldy, — dep habarlady ýnıversıtettiń baspasóz qyzmeti.
Atyraý oblysynyń qurylys basqarmasy ýnıversıtettiń apatty jaǵdaıdaǵy eki jataqhanasynyń ǵımaratyn buzý, stýdentterge arnalǵan 1000 oryndyq jańa jataqhana salý úshin jobalyq-smetalyq qujattama daıyndaǵan. Jańa nysannyń jobalaýshysy — «Avangard OK» JShS. Joba saraptamadan ótýge joldanǵan.
— Apatty dep tanylǵan № 2 jataqhana aınalasy qorshalǵan. Jataqhananyń qulaǵanynan eshkim zardap shekken joq, — dep málim etti baspasóz qyzmetinen.
Eske sala keteıik, buǵan deıin elordadaǵy Muńaıtpasov stadıony men «Qazaqstan» sport saraıynyń qurylysy qashan aıaqtalatyny habarlanǵan edi.