Atyraý túrmesinde kásipkerlerdiń shaǵymynan keıin jaldaý aqysy tómendetildi
ASTANA. KAZINFORM — Atyraýda túzeý mekemelerinde qyzmet etetin kásipkerlerdiń quqyqtary qorǵaldy, dep habarlaıdy oblystyq prokýratýranyń baspasóz qyzmeti.
Osy jyldyń 4 mamyrynda Atyraý oblysynyń prokýratýrasynda ashyq dıalog formatynda qyzmet orny túzeý mekemeleriniń aýmaǵynda ornalasqan kásipkerlermen kezdesý ótti.
Belgili bolǵandaı, kásipkerlerdi tolǵandyratyn máselelerdiń biri óndiristik úı-jaılardy jalǵa alý somasynyń joǵary bolýy.
Jaldaý aqysyn esepteý kezinde memlekettik múlikti jalǵa berý erejeleri júıeli túrde buzylýyna jol berilip, koeffıtsıentter durys qoldanylmaǵan.
Atap aıtqanda, úı-jaılardyń fýnktsıonaldyq maqsattary, olardyń jaılylyq dárejesi, sondaı-aq kásipkerlerdiń uıymdyq-quqyqtyq nysany durys anyqtalmaǵan, nátıjesinde jaldaý aqysynyń mólsherine aıtarlyqtaı áser etken.
— Prokýratýranyń aralasýynan keıin Memlekettik múlik departamenti qaıta esepteý júrgizip, jaldaý somasy 30-40%-ǵa tómendetildi. Mysaly, «ERTRI» JShS-niń jaldaý aqysy (tigin tsehy, 15 sottalǵan jumysqa ornalastyryldy) túzetilgennen keıin 71 myń teńgeden 45 myń teńgege deıin, jyldyq jaldaý somasy tıisinshe 856 myń teńgeden 547 myń teńgege tómendetildi. Osylaısha, qadaǵalaý aktisi boıynsha 14 kásipkerdiń quqyqtary qorǵaldy jáne kináli tulǵalar jaýapqa tartyldy, — delingen vedomstvo taratqan aqparatta.
Bıznes úshin qolaıly jaǵdaılar jasaý sottalǵan adamdardyń jumyspen qamtylýyn qamtamasyz etýge tikeleı áser etedi.
Búgingi tańda Atyraý oblysynyń áıelder kolonııasynda jumyspen qamtylýy 80% quraıdy.
Osyǵan deıin Qyzylordanyń túzeý mekemesinde 21 kásipker 600-deı jazasyn óteýshini jumyspen qamtyp otyrǵanyn jazdyq.
