Atyraý turǵyny úıinde fıtozerthana jabdyqtap, qarasora ósirgen
ATYRAÝ. KAZINFORM — Atyraý qalasy turǵynynyń úıinde fıtozerthana jabdyqtap, qarasora ósirgeni anyqtaldy.
Atyraý oblystyq polıtsııa departamentiniń baspasóz qyzmetinen málim etkendeı, 51 jastaǵy er adam fıtozerthanany úıinde jabdyqtaǵan.
«Esirtki qylmysyna qarsy is-qımyl basqarmasy men kınologııa qyzmeti ortalyǵynyń qyzmetkerleri úıinde qarasora ósimdigin ósirgen Atyraý qalasynyń turǵynyn ustady. Kúdikke ilingen turǵyn tyıym salynǵan ósimdikti ósirý úshin jaryq jáne jylý shamdaryn, sýarý júıesin ornatqan. Tekserý kezinde fıtozerthanada salmaǵy 1 keliden astam 68 túp qarasora tárkilendi», -dep habarlady departamenttiń baspasóz qyzmeti.
Polıtsııa qyzmetkerleri quramynda esirtki zattary bar, tyıym salynǵan ósimdikterdi zańsyz egip-ósirý deregimen sotqa deıingi tergep-tekserý júrgizilip jatyr.
Eske sala ketelik, budan buryn sıntetıkalyq esirtki saýdalaǵan BQO turǵyny 10 jylǵa sottalǵanyn jazǵan edik.
Sondaı-aq, sıntetıkalyq esirtki saqtady dep aıyptalǵan atyraýlyqtan tapansha men pyshaq tabyldy.
