Atyraý turǵyndarynyń 99,9%-y sý, gaz jáne elektrmen qamtylǵan

ASTANA. KAZINFORM — Atyraý oblysynda halyqty sapaly aýyz sýmen, kógildir otynmen, elektr jelilerimen qamtamasyz etý 99,9% jetken. Bul 713 myńnan asa adamnyń ómir sapasyn jaqsartty. Bul týraly óńir ákimi Serik Shápkenov eseptik baıandamasynda aıtty. 

Ákimniń aıtýynsha, turaqty jáne sapaly qyzmet kórsetý aıasynda birqatar ınfrastrýktýralyq joba iske asyrylǵan.

— Atap aıtsaq, Atyraý qalasy men Maqat turǵyndaryn aýyz sýmen úzdiksiz qamtý maqsatynda № 5 súzgi stansasy qaıta jańǵyrtylyp, sý tutyný kólemi táýligine qosymsha 50 myń tekshe metrge artty. Budan bólek, bes aýylda jazǵy sý jelisiniń 165 shaqyrymy tolyq salyndy, — dedi Serik Shápkenov Ortalyq kommýnıkatsııalar qyzmetinde.

Atyraý qalasy men oblys aýdandarynda 302 shaqyrym elektr jelisi jańartyldy, Nursaıa yqshamaýdanyndaǵy 66 shaqyrym jeli zamanaýı, qaýipsiz kabelderge aýystyryldy.

Sonymen birge, qýaty 32 MVt «Nursaıa-Samal» qosalqy stansasynyń qurylysy aıaqtaldy. Júıeni avtomattandyrý maqsatynda 30 dana avtomatty qaıta qosý qurylǵysy ornatyldy.

— Atyraý qalasynyń oń jaǵalaýynda saǵatyna 120 myń tekshe metr gaz taratatyn stantsııa men 46 shaqyrym magıstraldy gaz qubyrynyń qurylysy aıaqtalyp keledi. «Spýtnık» shaǵyn aýdanyna gaz berý jumystary sátti aıaqtalyp, nysan iske qosyldy, — dedi oblys ákimi.

Aıta keteıik, Atyraý oblysynda 20 jańa joba iske asyrylyp, 1 300-den asa jumys orny ashylady.

Sondaı-aq, Atyraýda kásipkerlikti damytýǵa 9 mlrd teńge bólingen.

Atyraýǵa 83 myńnan astam týrıst kelgen. Ásirese, ortaǵasyrlyq Saraıshyq pen Qıǵash ózenindegi Lotos alqaby týrızmdi damytýdaǵy basty baǵyttarǵa aınalǵan.