Atyraý turǵyndaryna úı salý úshin 1 myńǵa jýyq jer telimi berilgen
Atyraý oblysynyń turǵyndaryna 10 aıda jeke úı qurylysyn salý úshin 966 jer ýchaskesi berilgen, dep habarlaıdy Kazinform.
Atyraý oblystyq jer qatynastary basqarmasynyń basshysy Álibek Ermekqalıdyń málimetinshe, bıyl 1452 jer ýchaskesin berý kózdelgen.
«Jer kodeksiniń talaptaryna sáıkes jeti sanat bar. Onyń basym bóligi - aýyl sharýashylyǵy maqsatyndaǵy jer ýchaskesi. Byltyr aýyl sharýashylyǵy maqsatyndaǵy jer kólemi 3 mln 220 myń gektardy qurady. Al, bıyl bul maqsattaǵy jer - 3 mln 209 myń gektar. Tómendeýdiń basty sebebi — qaıtarylǵan jer kóleminiń artýy. Qazir oblystaǵy jer kólemi — 11 mln 863 myń gektar. Onyń tórtten biri aýyl sharýashylyǵy maqsatyndaǵy jerge jatady. Bıyl aýyl sharýashylyǵy maqsatyndaǵy 222 myń gektar 257 jer ýchaskesi keri qaıtaryldy», -deıdi Álibek Ermekqalı.
Onyń aıtýynsha, turǵyndarǵa jer ýchaskesin berý kezinde týyndaıtyn birqatar másele bar.
«Turǵyn úı salý úshin berilgen jer týraly sheshimdi alǵan adam aldymen quzyrly organǵa tirkelip, kadastrlyq josparyn jasaqtaýy qajet. Ókinishke qaraı qazir qolyna jer kezegi kelgeni týraly sheshimdi alǵan keıbir turǵyndar tirkelýdi eskermeıdi. Bul ásirese, aýdandarda kóp kezdesedi. Osyǵan baılanysty jerdiń berilgeni jóninde derekter bazasynda tirkelmegeni týraly aqparat bolsa, bul bos jer ekeni kórinip turady. Sáıkesinshe ári qaraı protsedýrany júzege asyrǵan kezde jerdiń bettesý faktisi anyqtalyp, qıyndyq týdyrady», — dedi Álibek Ermekqalı.
