Atyraý turǵyndaryna tútin men ystyń ıisine baılanysty kóshege shyqpaý eskertildi

ATYRAÝ. KAZINFORM — Atyraýda «Aqjaıyq» tabıǵı rezervatyndaǵy qamys órtiniń saldarynan ystyń ıisi kúsheıip tur. Qazir munaıly shahardy tútin tumshalap tur. 

Atyraý turǵyndary ystyń ıisine shaǵymdanyp jatyr. Áleýmettik jelide «Atyraýym, kók tútin», «Qamys janǵan kezde qaýipti», «Tunshyǵyp, óletin boldyq qoı» dep jazyp jatyr.

Atyraý oblystyq tótenshe jaǵdaılar departamentiniń ımıdjdik jumys jáne syrtqy kommýnıkatsııalar tobynyń málimetinshe, áýeden barlaý júrgizý jáne órtti sóndirý úshin departament qyzmetkerleri «Qazavıaqutqarý» AQ sý tógý qurylǵysy bar MI-8 tikushaǵymen qyzmetkerleri ushyp shyqty. Órtti sóndirýge 82 adam, 17 tehnıka tartylǵan.

— Qazir órttiń eldi mekenderge taralý qaýpi joq. Jeldiń saldarynan qalada tútin bar. Ystyń ıisi sezilip tur. Atyraý qalasynyń turǵyndary men qonaqtarynan qaýipsizdik maqsatynda kóshege shyǵýdan ýaqytsha bas tartýdy, terezeler men esikterdi jaýyp, balalardy nazardan tys qaldyrmaýdy suraımyz, — dep málim etti departamenttiń ımıdjdik jumys jáne syrtqy kommýnıkatsııalar tobynan.

Eske sala ketelik, budan buryn Atyraýdy «Aqjaıyq» tabıǵı rezervatyndaǵy qamys órtiniń tútini basqanyn jazǵan bolatynbyz.

Keıin «Aqjaıyq» tabıǵı rezervatyndaǵy qamys órti 3 táýlikten soń sóndirilgenin habarlaǵan edik.