Atyraý turǵyndaryna qurban malyn soıýǵa 14 qasapshy kómek beredi

ATYRAÝ. KAZINFORM – Atyraýda Qurban aıt namazy tańǵy saǵat 6:30-da oqylady. Bul kúni ulttyq salt-dástúrdi nasıhaıtyn is-sharalar men ulttyq oıyndardan jarystar ótkiziledi.

«Imanǵalı» ortalyq meshitiniń bas ımamy Bolatbek Ulashanulynyń aıtýynsha, Qurban aıt kúnderi izgilikke toly qaıyrymdy isterdi atqarýǵa umtylý kerek. 

– Musylmandar úshin eki ulyq mereke bar. Sonyń biri – Qurban aıt. Bul mereke adamzatty sabyrlyqqa, qaıyrymdylyqqa, meıirimdilikke úndeıdi. Bul kúnderi aǵaıyn-týysqa, dos-jaranǵa, barsha adamzatqa baýyrmal bolý kerek, - deıdi Bolatbek Ulashanuly.

Oblystyq din isteri basqarmasynyń basshysy Qaharman Musaevtyń aıtýyna qaraǵanda, Atyraý qalasynda qurban shalatyn tórt oryn daıyndalyp jatyr. Bul – «Týma» mal bazary, «Adal» mal soıý orny, «Imanǵalı» jáne «Quspan molda» meshiti janyndaǵy qasaphanalar.

– Aıt kúnderi áleýmettik jaǵdaıy tómen otbasylarǵa, jetimderge, jalǵyzbasty qarııalarǵa qurban eti jetkizilip, qaıyrymdylyq is-sharalary uıymdastyrylady. Qurbandyq shalý onlaın jáne oflaın formatta ótkiziledi. Turǵyndarǵa qurban malyn soıýǵa arnaıy oqýdan ótken 14 qasapshy kómektesedi. Onlaın tapsyrysty qurban.muftyat.kz saıty arqyly berýge bolady. Portalda mal túri, baǵasy men sıpattamasy tolyq kórsetilgen. Qurban shalynǵany týraly beınemálimet ótinish ıesine jiberiledi. Imamdar men eriktiler mal etin muqtaj turǵyndarǵa jetkizý isine jumyldyrylady. Muqtajdar tizimi arnaıy baza arqyly anyqtalady, -dedi Qaharman Musaev.

Eske sala ketelik, buǵan deıin Qurban shalý oryndary bekitilgeni habarlanǵan edi.