Atyraý turǵyndary jaǵymsyz ıisten mezi bolǵandaryn aıtyp, shaǵymdandy
ATYRAÝ.KAZINFORM – Atyraýdaǵy Mahambet Ótemisov kóshesinde ornalasqan №118b kópqabatty úıdiń turǵyndary jertóleni basqan las sý máselesine baılanysty narazylyq bildirdi. Turǵyndardyń aıtýynsha, birneshe jyldan beri sheshilmegen másele olardyń kúndelikti ómirine aıtarlyqtaı qıyndyq týǵyzyp otyr.
1969 jyly paıdalanýǵa berilgen turǵyn úı 2012 jyly qaıta jańǵyrtýdan ótken. Alaıda turǵyndar sol kezdegi jóndeý jumystary sapasyz júrgizilgenin aıtady. Olardyń sózinshe, káriz qubyrlary ábden tozyp, bıyl naýryz aıynda jarylǵan. Sonyń saldarynan jertóleni káriz sýy basyp, jaǵymsyz ıis búkil úıge taraǵan.
– Bul kárizge túsip ketseń, batyp ketýge bolady. Jertóle tolyǵymen sýǵa tolyp tur. Iisi qolqany qabady. Biz ákimdikke birneshe ret shaǵymdandyq. Tipti qaıta jańǵyrtýdan keıin sottasqan bolatynbyz. Olar káriz qubyrlaryn tazalap beremiz dep ýáde bergen. Biraq áli kúnge deıin eshteńe istelmedi. Al qaǵaz júzinde bári oryndalǵan bolyp tur, – deıdi qala turǵyny Marııa Ivanovna.
100 páterli úı turǵyndarynyń aıtýynsha, eki aı buryn olar máseleni sheshý úshin qalalyq turǵyn úı-kommýnaldyq sharýashylyǵy jáne turǵyn úı ınspektsııasy bólimine júgingen. Alaıda bastalǵan jumystar aıaqsyz qalǵan.
– Nemerelerim kelgende «ata, úıden jaǵymsyz ıis shyǵady» dep ishke kirmeıdi. Qubyrdyń ıisi úıdiń ishine deıin shyǵady. Úıde otyrý múmkin emes. 2012 jyly modernızatsııadan ótti. Jartysyn ǵana tazalap, qalǵanyn qaldyrdy. Sol úshin 54 mıllıon teńge tóledik, – deıdi turǵyn Qanat Ýahıtov.
Al jaýapty mekeme ókilderi máseleniń bar ekenin rastady. Atyraý qalalyq turǵyn úı-kommýnaldyq sharýashylyǵy jáne turǵyn úı ınspektsııasy bólimi sektory basshysynyń mindetin atqarýshy Erbol Aıtqalıevtiń aıtýynsha, qazir merdiger mekemeniń brıgadalary áleýmettik nysandarda jumys istep jatyr.
– Qazir mektepter men balabaqshalardaǵy jumystar júrgizilip jatyr. Olar aıaqtalǵan soń Mahambet kóshesindegi úılerge kóshemiz. Bul josparǵa engizilgen. Negizgi jumystar maýsym aıynda bastalady, – dedi ol.
Alaıda turǵyndar jaýaptylardyń bul ýádesine senýden qalǵanyn aıtady. Óıtkeni káriz máselesi birneshe jyldan beri sheshimin tappaı keledi.
Buǵan deıin Taldyqorǵanda daýyl turǵyn úıdiń shatyryn julyp áketkenin jazǵan edik.
