Atyraý turǵyndary kóshe jaryǵy men oıyn alańyn salyp berýdi talap etip otyr
ATYRAÝ. KAZINFORM — Atyraý qalasyndaǵy Kókarna aýylynda turǵyndar birneshe jyldan beri sheshilmeı kele jatqan máselelerge shaǵymdandy. Aýyldyń bir bóliginde kóshe jaryǵy joq, jaıaý júrginshilerge arnalǵan jol men balalar oınaıtyn alań jetispeıdi.
Kókarna aýyly Býharka ózeginiń eki jaǵynda ornalasqan. Turǵyndardyń aıtýynsha, ózektiń bir jaǵynda jaǵdaı birshama jaqsy bolǵanymen, ekinshi bóligi nazardan tys qalyp otyr.
Kesh túskende qarańǵy kóshelermen júrý turǵyndarǵa qıyndyq týǵyzady. Ásirese qarttar men múmkindigi shekteýli jandar úshin bul úlken másele. Turǵyndar balalardyń da qaýipsizdigine alańdaıdy. Sebebi aýylda oıyn alańy bolmaǵandyqtan, keıbiri jol boıynda nemese joǵary kerneýli elektr jelisiniń mańynda oınaýǵa májbúr.
— 24-shi kóshe men 11-shi ótkelde jaǵdaı joq. Kóshe jaryqtandyrylmaǵan, jaıaý júrginshiler joly salynbaǵan. Balalar oınaıtyn alań bolmaǵandyqtan, joǵary kerneýli jeliniń mańynda júredi. Bul óte qaýipti. Bul máselelerdi ákimdikke buryn da aıtqanbyz. Biraq únemi kelesi jylǵa qalyp keledi, — dedi aýyl turǵyny Murat Áýbákirov.
Taǵy bir turǵyn Gúlsara Kaboshevanyń aıtýynsha, balalar qaýipsiz jerde oınaı almaıdy. Onyń sózinshe, aýyl ishimen úlken júk kólikteri de júrip ótedi.
— Balalarymyzǵa oınaıtyn jer joq. Sondyqtan joldyń boıynda oınaýǵa májbúr. Kóshelerde úlken júk kólikteri júredi. Balalarymyz úshin alańdaımyz. Fýtbol alańy kerek, — dedi ol.
Qalalyq TÚKSh jáne turǵyn úı ınspektsııasy bóliminiń málimetinshe, Kókarnadaǵy kóshe jaryǵy máselesi nazarǵa alynǵan. Qazir Atyraý qalasyndaǵy 300-ge jýyq kósheni jaryqtandyrý úshin joba ázirlengen. Sonyń ishinde Kókarnadaǵy 15 kóshe bar.
— 24-shi kóshe bizdiń josparymyzda bar. Bıýdjetten aqsha bólinse, jaryqtandyrý jumystary júrgiziledi. Naqty qashan bastalatynyn qazir aıta almaımyz. Jalpy joba eki jylǵa eseptelgen, — dedi qalalyq TÚKSh jáne turǵyn úı ınspektsııasy bólimi sektorynyń bas mamany Aman Latıpov.
Ákimdik ókilderi Kókarnadaǵy balalar men jastarǵa arnalǵan sport oryndaryn kóbeıtý josparlanyp otyrǵanyn habarlady.
— Kaspııskaıa kóshesine jáne 31-shi kóshege 43×23 ólshemdi fýtbol alańyn salý josparlanyp otyr. Nurmashev kóshesine sporttyq-jattyǵý kesheniniń salý úshin jobalyq-smetalyq qujattama ázirlenip, joba tıisti saraptamanyń oń qorytyndysy alyndy. Qazirgi tańda merdiger mekemeni anyqtaý úshin tıisti qarajat suratyldy, — dep habarlady ákimdik.
Eske salaıyq, Atyraý qalasynyń jańa bas josparynda sý basý qaýpi bar aýmaqtarda, sanıtarlyq-qorǵanysh aımaqtarynda jáne ınjenerlik jelilerdiń qorǵaý beldeýlerinde ornalasqan nysandardy kezeń-kezeńimen memleket muqtajyna alyp, buzý qarastyrylǵan.
