Atyraý turǵyndary Kórisý kúni men 22 naýryzda qoǵamdyq kólikpen tegin júredi
ATYRAÝ. KAZINFORM – Atyraý qalasynyń turǵyndary men qonaqtary 14 jáne 22 naýryzda qoǵamdyq kólikpen tegin qatynaıdy.
Atyraý qalasynyń ákimi Shákir Keıkınniń aıtýynsha, qoǵamdyq kólikter bul kúnderi munaıly shahar men onyń mańyndaǵy eldi mekenderge jolaýshylardy tegin tasymaldaıdy.
– Kórisý kúni men Naýryz merekesine oraı 14,22 naýryz kúnderi Atyraý qalasynda, oǵan jaqyn ornalasqan aýyldyq okrýgterde qoǵamdyq kólikter tegin qatynaıdy. Turǵyndardyń bul kúnderi jaqyndarymen qaýyshyp, Ulystyń uly kúnin keńinen atap ótýge atsalysý úshin osyndaı sheshim qabyldandy. Qoǵamdyq kólikterde tegin júrý atyraýlyqtar men qonaqtardyń merekelik kóńil kúıin kóterýge múmkindik beredi, - deıdi Shákir Keıkın.
Qalalyq ákimdiktiń baspasóz qyzmeti usynǵan aqparatqa súıensek, qazir jolaýshy tasymaldaıtyn 5 kompanııa bar.
– Atalǵan kompanııalardan kún saıyn 32 marshrýt boıynsha 250-ge jýyq avtobýs jolǵa shyǵady. Avtobýstar Atyraý qalasy men jaqyn mańdaǵy eldi mekenderge jolaýshy tasymaldaıdy, - dep habarlady ákimdiktiń baspasóz qyzmeti.
Eske sala ketelik, budan buryn Atyraýdan Almatyǵa baratyn 160 jolaýshy Qarabatan stansasyna avtobýspen jetkizilgenin habarlaǵan bolatynbyz.