Atyraý turǵyndary qalany jaılaǵan ótkir ıiske shaǵymdandy
ATYRAÝ.KAZINFORM – Cońǵy kúnderi atyraýlyqtardyń aýa sapasyna qatysty shaǵymy kóbeıdi. Óńir turǵyndary áleýmettik jeli arqyly jaǵymsyz ári basty aýyrtatyn ıistiń kúsheıgenin aıtyp, bılikten máseleni sheshýdi surady.
Qala turǵyndarynyń aıtýynsha, ıis úıdiń ishinde de sezilip, tynys alýdy qıyndatqan. Olar ıistiń qaıdan taraǵanyn túsindirýdi jáne onyń adam densaýlyǵyna yqtımal áserine qatysty naqty aqparat berýdi talap etip otyr. Keıbiri ıisten júregi aınyp, ózin jaısyz sezingenin jazǵan.
Atyraý turǵyndary AirKaz.org platformasy arqyly qaladaǵy aýa sapasynyń kórsetkishterin baqylap, ondaǵy málimetterdi áleýmettik jelilerde bólisip otyr. Mysaly, 7 qyrkúıek saǵat 05:00-degi derekte Avangard yqshamaýdanynda kúkirtsýtek mólsheri 60 mkg/m³ bolǵany, bul kórsetkishtiń ruqsat etilgen shekti deńgeıden 7,5 ese joǵary ekeni kórsetilgen.
109 biryńǵaı baılanys ortalyǵynyń málimetine súıensek, 1 qyrkúıekten beri turǵyndardan jelige aýa sapasyna qatysty 70-ten asa shaǵym túsken.
Al Atyraý oblysy boıynsha ekologııa departamenti 31 tamyz ben 6 qyrkúıek aralyǵynda Atyraý oblysynyń sanıtarııalyq-epıdemıologııalyq baqylaý departamenti monıtorıng júrgizdi, aýa quramyndaǵy lastaýshy zattar shekti normadan aspady dep otyr.
Mamandar Hımposelok yqshamaýdanyndaǵy Qabdolov pen Aqyn Sara kósheleriniń qıylysynan, «Vostok» beketinen, Jeńis saıabaǵy mańynan jáne Azattyq kóshesi, 169 mekenjaıyndaǵy «Saýda bazasy» aýmaǵynan synama alǵan. Zertteý barysynda kúkirtsýtegi, kúkirt dıoksıdi, kómirsýtegi jáne kómirtegi oksıdi sekildi lastaýshy zattardyń mólsheri tekserilgen.
Hımposelok yqshamaýdanynda kúıik ıisi, al «Saýda bazasy» aýmaǵynda kómirsýtektiń ıisi sezilgen. Alaıda alynǵan synamalar nátıjesinde lastaýshy zattardyń ruqsat etilgen shekti sheginen asqany anyqtalmapty.
- Qala turǵyndarynyń jaǵymsyz ıiske baılanysty shaǵymdaryna sáıkes 5 qyrkúıek kúni Atyraý oblysynyń sanıtarııalyq-epıdemıologııalyq baqylaý departamentine qarasty «Ulttyq saraptama ortalyǵy» AQ jáne «Atyraý munaı óńdeý zaýyty» JShS-niń mamandary Atyraý qalasynyń Nursaıa yqshamaýdany, №13 Aqshaǵala beketi, «AMÓZ» JShS-niń sanıtarlyq qorǵaý aımaǵyna tys jerden, atalaǵan zaýytqa tıesili №2 Proparka ekobeketi tusynan atmosferalyq aýadan synama alý jumystaryn júrgizdi. Birlesip júrgizilgen atmosferalyq aýadan synama alý jumystary nátıjesinde, gaztaldaǵysh qurylǵylar lastaýshy zattardyń ruqsat etilgen normadan asý deregin anyqtamady,-dep habarlady ekologııa departamenti.
6 qyrkúıek kúni Atyraý oblysynyń sanıtarııalyq-epıdemıologııalyq baqylaý departamenti aýadan synama alǵan. Ázirge qorytyndysy shyqpaǵan.
Al bılik ádettegideı jaýaptylardyń basyn qosyp, jıyn ótkizdi. Oblys ákimdigi taratqan aqparatqa súıensek, jergilikti atqarýshy organ aýa sapasyna monıtorıng júrgizetin óńirlik júıe qurý boıynsha usynystardy jınap, lastanýdyń yqtımal kózderin jan-jaqty ári obektıvti teksermek.
Aıta keteıik, 7 qyrkúıekte Pavlodar, Almaty qalalarynda, túnde Qaraǵandy, Jezqazǵan, Balqash, Temirtaý, Óskemen, Semeı, Atyraý jáne Astana qalalarynda qolaısyz meteorologııalyq jaǵdaılar kútiledi.
