Atyraý turǵyndary eki apta boıy ystyq sýsyz otyrady
ATYRAÝ. KAZINFORM – Atyraý qalasynda aldaǵy eki aptada ystyq sý berý ýaqytsha toqtatylady.
Atyraý oblysynyń energetıkalyq kesheni baspasóz qyzmetiniń aqparatyna súıensek, 2-15 qyrkúıek aralyǵynda munaıly shahardaǵy turǵyn úıler men ózge de nysandarǵa ystyq sý berýdi toqtatý josparlanyp otyr.
«Qazir Atyraý qalasynda ystyq sýmen jáne jylýmen qamtıtyn 52 jylý berý pýnkti bar. «Atyraý jylý júıeleri» AQ 2024 jyldyń 2-15 qyrkúıek aralyǵynda qala boıynsha magıstraldy jylý qubyrlarymen ystyq sý berýdi tolyq toqtatady. Osy kezeńde kúrdeli jóndeýge baılanysty jospardyń kestesine sáıkes jóndeý jumystary júrgiziledi. Osyǵan baılanysty Atyraý qalasynyń turǵyndary men qonaqtaryn kórsetilgen merzimde barlyq jylý pýnktinen ystyq sý berý ýaqytsha toqtaıtynyn habarlaımyz», - dep málim etti energetıkalyq keshenniń baspasóz qyzmetinen.
Eske sala ketelik, buǵan deıin Qulsarydaǵy sý tazartý qurylǵylary jańǵyrtylýy múmkin ekenin habarlaǵan bolatynbyz.
