Atyraý teatry birinshi respýblıkalyq teatrlar festıvaliniń bas júldesin ıelendi
Atyraýda daýylpaz aqyn, aqberen batyr Mahambet Ótemisulynyń týǵanyna 200 jyl tolýyna oraı birinshi respýblıkalyq teatrlar festıvali qorytyndylandy. Bir aptaǵa sozylǵan festıvaldiń bas júldesin Mahambet atyndaǵy akademııalyq qazaq drama teatry ıelendi, dep habarlaıdy Kazinform.
Festıvalge irikteýden ótken 7 teatr qatysty. Olar – Mańǵystaýdan N.Jantórın atyndaǵy mýzykalyq drama teatry, Jezqazǵannan S.Qojamqulov atyndaǵy qazaq mýzykalyq drama teatry, Aqmola oblysynan Sh.Qusaıynov mýzykalyq drama teatry, Qostnaıdan І.Omarov atyndaǵy qazaq drama teatry, Shymkentten J.Shanın atyndaǵy akademııalyq qazaq drama teatry, Batys Qazaqstannan H.Bókeeva atyndaǵy qazaq drama teatry men jergilikti Mahambet atyndaǵy akademııalyq qazaq drama teatry.
Óner ujymdarynyń qoıylymyn baǵalaıtyn qazylar alqasyna Qazaqstannyń Halyq ártisi, Memlekettik syılyqtyń laýreaty Tuńǵyshbaı Jamanqulov jetekshilik etti.
«Mahambet sózderiniń bári derlik – ótkir, adýyndy. Sol sebepten, óner dodasy tartysty ótip, qoıylymdar asqan sheberlikpen sahnalanatynyna úmittendik», - dedi Tuńǵyshbaı Jamanqulov.
Óner dodasynyń shymyldyǵy Mahambet atyndaǵy akademııalyq qazaq drama teatrynyń Táken Álimqulovtyń «Qosh bol, Qaraoı» rekvıemin sahnalaýmen bastady. Ár teatrdyń qoıylymy ózindik órnegimen kórermendi tánti etti.
Qazylar alqasynyń sheshimimen festıvaldiń bas júldesi «Qosh bol, Qaraoı» rekvıemin sahnalaǵan Atyraý oblystyq Mahambet atyndaǵy akademııalyq qazaq drama teatryna berildi. «Juban» spektaklin usynǵan Batys Qazaqstan oblystyq H.Bókeeva atyndaǵy qazaq drama teatry birinshi júldege laıyq dep tanyldy. Ekinshi oryndy «Álıhannyń amanaty» qoıylymymen N.Jantórın atyndaǵy Mańǵystaý oblystyq mýzykalyq drama teatry ıelendi. Mahambet atyndaǵy arnaıy syılyqty І.Omarov atyndaǵy Qostanaı oblystyq qazaq drama teatry «Aljır» qoıylymymen jeńip aldy.
Sondaı-aq Gaýhar Mangýlova «Úzdik rejısser», Temirbek Muhtarov «Úzdik stsenograf» atandy. Al «Úzdik er adam beınesi» atalymyn Medǵat Ómiralıev, «Úzdik áıel adam beınesi» atalymyn Nurlygúl Jubatova ıelendi.
«Ekinshi plandaǵy er adam beınesi» atalymyna Raýan Taımas, «Ekinshi plandaǵy áıel adam beınesi» atalymyna Jibek Úsenova ıe boldy. Festıval sońynda birneshe qyzmetker «Mádenıet salasynyń úzdigi» tósbelgisimen marapattaldy.
Eske sala ketelik, budan buryn Atyraýda Qurmanǵazy atyndaǵy dombyrashylar baıqaýynyń jeńimpazy anyqtalǵanyn jazǵan edik.
