Atyraý: Taldykól turǵyndary úıine qaıyqpen oralyp jatyr
ATYRAÝ. KAZINFORM – Atyraý oblysyndaǵy Taldykól aýylynyń keıbir turǵyny úıine qaıyqpen oralyp jatyr.
Tasqyn sý basý qaýpine baılanysty 13 mamyrda Mahambet aýdanyndaǵy Taldykól aýylynyń turǵyndaryn evakýatsııalaý bastalǵan edi. Keıin 24 mamyrda Atyraý-Oral trassasynan atalǵan aýylǵa baratyn joldy tasqyn sý basty. Osyǵan baılanysty 25 mamyrda eldi meken turǵyndaryn májbúrli evakýatsııalaý qolǵa alyndy.
Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, Taldykól aýylynan 2206 adam, onyń ishinde 8 bala qaıyqpen kóshirilgen.
«Atyraý qalasyndaǵy «APEC PetroTechnic» kolledjinde ashylǵan evakýatsııalyq pýnktke ornalasqan turǵyndardyń keıbiri úıine oralýǵa sheshim qabyldady. Búgin, 4 maýsym saǵat 17:00-degi málimetke sáıkes 100-den astam taldykóldik turǵyn úıine oraldy. Onyń ishinde 8 bala bar. Jedel qutqarý jasaǵynyń qutqarýshylary turǵyndardy aýylǵa deıin qaıyqpen tasymaldady. Eldi meken aýmaǵyndaǵy bir sharýa qojalyǵyna Sherp avtokóligimen azyq-túlik jetkizildi», - dep habarlady departamenttiń qoǵammen baılanys toby.
Turǵyndar tańerteńgi saǵat 08:00-den keshki saǵat 21:00 deıin tasymaldanady. Oǵan jedel qutqarý jasaǵynyń 7 qutqarýshysy, 1 qaıyq, 2 avtokólik, 1 Sherp arnaıy tehnıkasy bólingen.
Eske sala ketelik, budan buryn Atyraý oblysynda Jaıyq ózenindegi sý tasqyny sharyqtaý sheginen ótkenin habarlaǵan bolatynbyz.
