Atyraý stýdentteri «Kaspıı oıyndary» ýnıversıadasynyń jeńimpazy atandy
ATYRAÝ. KAZINFORM – H.Dosmuhamedov atyndaǵy Atyraý ýnıversıtetiniń stýdentteri VII halyqaralyq «Kaspıı oıyndary» ýnıversıadasynda birinshi oryn aldy. Reseı Federatsııasynyń Astrahan qalasyndaǵy saıysta komandalar jeńil atletıka, fıdjıtal-fýtbol, sambo, júzý, voleıbol, fýtbol, shahmat, doıby syndy sport túrlerinen synǵa tústi.
Halyqaralyq oıyndarǵa Kaspıı teńiziniń jaǵalaýyndaǵy 5 el – Qazaqstannan, Ázerbaıjannan, Reseı Federatsııasynan, Túrkimenstan Iran Islam Respýblıkasynan 14 joǵary oqý ornynan 700-den stýdentteri qatysty. Onda Reseıde bilim alyp júrgen afrıkalyq 9 eldiń stýdentteri de baq synaǵan.
«Bes kúnge sozylǵan sporttyq saıysta H.Dosmuhamedov atyndaǵy Atyraý ýnıversıtetiniń І kýrs stýdenti Gúlhan Shyńǵyshan 1500 jáne 3000 metrge júgirýden kúmis, 800 metrge júgirýden altyn medalǵa ıe boldy. Al, ІІІ kýrs stýdenti Álfııa Muhıdenova 3 myń metrge júgirýden qola medal ıelendi. Sambodan Narıman Muhan, Qazbek Ańsaǵan jáne Bekbol Muqashev birinshi Dinmuhammed Qılymov ekinshi, Dinmuhanbet Shamenov úshinshi oryn aldy», - dep habarlady ýnıversıtettiń baspasóz qyzmeti.
Sondaı-aq, І kýrs stýdentteri Janel Ádıet pen Bekarys Jumalıev doıbydan, Nurbek Haıroshev shahmattan chempıon atanǵan. Ýnıversıtettiń erler arasyndaǵy basketboldan, fıdjıtal basketbol men fýtboldan, sambo, shahmat, doıbydan birinshi oryn, al fıdjıtal-fýtbol men voleıboldan ekinshi oryn ıelengen.
«H.Dosmuhamedov atyndaǵy Atyraý ýnıversıtetiniń stýdentteri VII halyqaralyq «Kaspıı oıyndary» ýnıversıadasynda tabysty óner kórsetti. Ýnıversıada oıyndarynyń qorytyndysymen atyraýlyq stýdentter jalpy komandalyq esepte birinshi orynǵa ıe boldy», - dep málim etti baspasóz qyzmetinen.
Eske sala ketelik, buǵan deıin atyraýlyq oqýshy Grekııada ótken án festıvaliniń bas júlde alǵanyn jazǵan edik.
