Atyraý sotynda memlekettik Týdy qorlaǵan taǵy bir jasóspirimniń isi qaraldy

ATYRAÝ. KAZINFORM – Atyraýda 4 adam ózge tilde jazýy bar memlekettik Týmen fotoǵa túsip, áleýmettik jelide taratqan edi. Quqyq buzýshylardyń 2-eýi – kámeletke tolmaǵan jasóspirim.

Atyraý qalasyndaǵy ákimshilik quqyq buzýshylyqtar jónindegi mamandandyrylǵan sotynda memlekettik rámizdi qorlaǵan jasóspirimniń biriniń isi qaraldy. Kámelet jasyna tolmaǵan jasóspirim A.-ǵa QR Ákimshilik quqyq buzýshylyq týraly kodeksiniń 434-babynyń 1-bóligimen (Usaq buzaqylyq) aıyp taǵylǵan.

– Sot materıalynda kórsetilgendeı, 2025 jylǵy 23 naýryzda kámeletke tolmaǵan A. basqa úsh quqyq buzýshymen birge Atyraý qalasyndaǵy muz aıdyny ǵımaratynda arab tilindegi jazýy bar Qazaqstan Respýblıkasynyń Týymen sýretke túsken. Sýretti áleýmettik jeli arqyly taratyp, usaq buzaqylyq jasaǵan. Quqyq buzýshynyń kinási ákimshilik quqyq buzýshylyq týraly hattamamen, fotosýretpen, baıanatpen jáne basqa da is materıaldarymen tolyq dáleldendi, - dep habarlady sottan.

Sot qaýlysymen kámeletke tolmaǵan A.-nyń zańdy ókiline ákimshilik jaza retinde 39 myń 320 teńge ákimshilik aıyppul salyndy.

Sot qaýlysy zańdy kúshine engen joq.

Eske sala ketelik, budan buryn memlekettik Týdy qorlaǵan atyraýlyqtyń biri 15 táýlikke qamaýǵa alynǵanyn jazǵan bolatynbyz.