Atyraý soty qoly jaraqattanǵan operatordyń shaǵymyn qanaǵattandyrýdan bas tartty
ATYRAÝ. KAZINFORM – Atyraý qalasynyń turǵyny 2022 jyly shart boıynsha kólik jýý operatory bolyp jumysqa qabyldanǵan. Alaıda, 3 aıdan keıin jýý mehanızmimen tehnıkalyq tuzdy usaqtaý kezinde sol qolynan jaraqat alǵan.
Joǵarǵy sottyń málimetinshe, Atyraý oblystyq memlekettik eńbek ınspektsııasy basqarmasy jazataıym oqıǵa faktisin JShS-ǵa habarlaǵan. Oqıǵany tekserý úshin komıssııa taǵaıyndaý týraly buıryq shyǵarylǵan. Tekserýdiń nátıjesinde jazataıym oqıǵanyń óndiristik qyzmetpen baılanysty ekeni, onyń 30%-y jumyskerdiń, al, 70%-y jumys berýshiniń kinásinen bolǵany anyqtalǵan.
Jumys berýshi seriktestik sotqa deıingi tergep-tekserý nátıjelerimen kelispeı, shaǵym túsirgen. Biraq, arnaıy tergeý aktisi ózgerissiz qaldyrylǵan.
Sondyqtan, JShS sotqa memlekettik eńbek ınspektsııasy basqarmasy tarapynan jazataıym oqıǵany arnaıy tekserý aktisin joıý jóninde ákimshilik talap qoıýmen júgindi. Atyraý mamandandyrylǵan aýdanaralyq ákimshilik soty jáne apellıatsııa arnaıy tergep-tekserý daýly aktisiniń zańdylyǵyn atap, talap qoıýdy qanaǵattandyrýdan bas tartty. Eńbek kodeksiniń 23-babynyń 2-tarmaǵynyń 25) tarmaqshasyna sáıkes jumys berýshi eńbek qaýipsizdigi men eńbekti qorǵaýǵa ishki baqylaýdy júzege asyrýǵa mindetti bolady.
«Belgilengen mán-jaılardan jáne zerttelgen is materıaldarynan jábirlenýshiniń áreketinde óreskel abaısyzdyqtyń sýbektıvti belgileri bar ekeni anyqtaldy. Sot kelesi faktilerdi senimdi túrde anyqtady. Іs materıaldarymen jumys berýshi tarapynan joqqa shyǵarylmady. Birinshiden, eńbek qaýipsizdigi jáne eńbekti qorǵaý boıynsha ishki baqylaý bolmaǵan. Ekinshiden, usatqysh mehanızminiń qorǵanys qabyǵyn ornatý boıynsha sharalar qabyldanbaǵan. Úshinshiden, jazataıym oqıǵa bolǵan kúni jumysshylardyń qajetti sany qamtamasyz etilmegen. Jumysker men jumys berýshiniń kinásiniń dárejesin durys anyqtaý, jazataıym oqıǵany tergep-tekserý barysynda jaýapker tarapynan buzýshylyqtardyń bolmaýy, jumys berýshiniń eńbek qaýipsizdigi men eńbekti qorǵaýdy tıisti deńgeıde baqylaýǵa almaýy talap qoıýdy qanaǵattandyrýdan bas tartý týraly sot sheshimine negiz boldy», -dep habarlady Joǵarǵy sottan.
Joǵarǵy sottyń ákimshilik ister jónindegi sot alqasy jergilikti sottardyń qorytyndysymen tolyq kelisip, talap qoıýshynyń kassatsııalyq shaǵymyn qanaǵattandyrýsyz qaldyrdy.
Eske sala ketelik, buǵan deıin Atyraýda ІІ top múgedegi tis emhanasynyń sapasyz qyzmeti úshin sotqa júgingenin jazǵan edik.
