Atyraý soty depýtat pen bloger daýyna qatysty úkim kesti

ATYRAÝ. KAZINFORM — Atyraýda oblystyq máslıhat depýtaty men jergilikti bloger arasynda daý týyndady. Sot úkimimen blogerge 100 aıyq eseptik kórsetkish mólsherinde aıyppul salyndy.

Atyraý oblystyq sotynyń baspasóz qyzmetinen málim etkendeı, bul is № 2 qalalyq sotta qaraldy. 

— Sottalýshyǵa QR Qylmystyq kodeksiniń 109-1-babynyń 2-bóliginiń 5) tarmaǵymen (Buzaqylyq nıetpen uryp-soǵý áreketin jasaý) aıyp taǵylǵan. Ol oblystyq máslıhattyń depýtatymen kezdesip, buzaqylyq nıetpen onyń kabınetten shyǵýyna kedergi keltirgen. Ǵımarat dálizinde ony qolymen ıterip, birneshe márte soqqylar jasaǵan. Sottalýshynyń kinási kýálardyń aıǵaqtarymen, sot-dárigerlik saraptama qorytyndysymen, beınejazbamen dálelin tapty, — dep habarlady oblystyq sottyń baspasóz qyzmeti.

Sot otyrysyna qatysqan prokýror sottalýshyǵa 200 aılyq eseptik kórsetkish mólsherinde aıyppul túrindegi jaza taǵaıyndaýdy usyndy. Alaıda sottalýshy taǵylǵan aıypty tolyq moıyndaǵan joq. Ol qorǵaýshysymen birge aqtaý úkimin shyǵarýdy surady.

Degenmen, sottalýshynyń asyraýynda jas balalary bar. Bul jaıt sottalýshynyń qylmystyq jaýaptylyǵy men jazasyn jeńildetetin mán-jaı retinde tanyldy. Aýyrlatatyn mán-jaılar anyqtalmady.

— Sottalýshy taǵylǵan aıyp boıynsha kináli dep tanyldy. Oǵan 100 aılyq eseptik kórsetkish mólsherinde aıyppul salý jazasy taǵaıyndaldy, — dep málim etti sottyń baspasóz qyzmetinen.

Sot úkimi zańdy kúshine engen joq.

Eske sala ketelik, buǵan deıin Atyraýda balany tepken tárbıeshige qatysty sotqa deıingi tergeý bastalǵanyn habarlaǵan edik.