Atyraý soty 20 jyl boıy jerdi paıdalanbaǵan turǵynnyń quqyǵyn qorǵaýdan bas tartty

ATYRAÝ. KAZINFORM – Atyraý turǵyny 20 jyl buryn jer ýchaskesin maqsatyna sáıkes paıdalanbaı kelgen. Keıin ákimdik oǵan jer ýchaskesin paıdalaný merzimin uzartýdan bas tartqan.

B-ǵa 2003 jyldyń qyrkúıeginde jer ýchaskesi ýaqytsha paıdalanýǵa berilgen. Al 2018 jyldyń aqpanynda jer paıdalaný merzimi 2 jylǵa uzartylǵan. Bul merzim 2020 jyldyń aqpanynda aıaqtalǵan.

Osyǵan baılanysty B. 2023 jyldyń tamyzynda jer paıdalaný merzimin uzartý týraly ótinish bergen. Jer komıssııasynyń dáleline súıengen ákim merzimdi uzartýdan bas tartqan.

Bul sheshimmen kelispegen azamat B. sotqa júgindi. Ol jer komıssııasynyń sheshimi men ákimniń qaýlysyn daýlap, jer paıdalaný quqyǵyn uzartýdy mindetteýdi surady. Alaıda eki ınstantsııa soty bul talapty qanaǵattandyrýdan bas tartqan.

Munyń sebebin Atyraý oblystyq sotynyń ákimshilik ister jónindegi sot alqasynyń tóraǵasy Anargúl Salıhova tómendegishe túsindirdi.

– Talap qoıýshynyń talabyn qanaǵattandyrýdan bas tartýǵa negizgi sebep – Jer kodeksiniń 37-babynyń 2-tarmaǵyndaǵy talaptardyń saqtalmaýy. Jer paıdalanýshy jalǵa alý sharty merziminiń aıaqtalýyna 3 aı qalǵanda ýákiletti organǵa ony uzartý týraly júginýge tıis. Alaıda talap qoıýshy 3 jyl 6 aı kesh júgingen. Talap qoıýshy jerdi nysanaly maqsatyna sáıkes paıdalanǵanyn dáleldeıtin qujattar usynbaǵan. Ýchaskeni tekserý kezinde «satamyn» degen jazý anyqtalǵan. Jer alǵash berilgennen beri 20 jyldan astam merzim ótken. Osy merzim ishinde talap qoıýshy jerdi ıgermegen, - deıdi Anargúl Salıhova.

Eki ınstantsııa soty osy faktilerdi eskerip, QR Azamattyq kodeksiniń 8-babyna sáıkes talap qoıýshynyń quqyqtaryn qorǵaýdan bas tartty.

Talap qoıýshy kassatsııaǵa júgingen joq. Sot aktisi zańdy kúshine endi.

Eske sala ketelik, buǵan deıin Atyraý soty ýádesinde turmaǵan turǵynǵa 2,9 mln teńgeni tóleýdi mindettegen bolatyn.