Atyraý sharýalary sıyrdyń júni túsip, qotyr aýrýyna ushyraǵanyna alańdaıdy

ATYRAÝ. KAZINFORM – Atyraýda múıizdi iri qaranyń júni túsip, qotyr aýrýyna ushyraǵan. Sharýa qojalyǵynyń ıeleri buǵan alańdaýshylyq bildirip otyr.

Máselen, «Abdýlla» sharýa qojalyǵynyń ókili Nurbek Esenqulovtyń aıtýynsha, sharýashylyq Atyraý qalasynyń mańyndaǵy Qaıyrshaqty aýyldyq okrýgindegi Sokolok kanalynyń boıynda ornalasqan. Qojalyqta 105 sıyr bar. 

– Bizdiń sharýashylyqta múıizdi iri qaradaǵy qotyr aýrýy byltyrǵy qazan, qarasha aılarynda anyqtaldy. Sodan beri 15-20 sıyr aýyrdy. Bul aýrýǵa negizinen sıyrdyń atalyq túri shaldyqty. Múıizdi iri qaranyń júni túsip qaldy. Orny qyzaryp, qany shyǵyp turdy. Soǵan baılanysty veterınar shaqyryp, ekpe saldyrdyq. Sodan keıin toqtaǵandaı boldy. Biraq áli tolyq joıylǵan joq, - deıdi Nurbek Esenqulov. 

Onyń aıtýynsha, bastapqyda kanaldaǵy sýdan kúdiktengen. Óıtkeni qazir kanalda aǵys joq. Sý azaıǵan. 

– Alaıda veterınarlar bul aýrý kanal sýynyń áseri joq dep otyr. Olar kanaldyń jańartylmaǵan sýyn ishkennen qotyr shyqpaıdy dedi. Qańtardan beri sharýashylyǵymzdaǵy múıizdi iri qara eki ret egildi. Úlkenderdiń aıtýymen motordyń paıdalanylǵan maıyn jaqtyq, - deıdi Nurbek Esenqulov.

Osyǵan oraı veterınarııalyq baqylaý jáne qadaǵalaý komıteti Atyraý oblystyq aýmaqtyq ınspektsııasynyń basshysy Nurjan Úsenbaevqa habarlasqan edik. 

– Qotyr asa qaýipti aýrýlar qataryna jatpaıdy. Sol sebepten alańdaıtyndaı negiz joq. Al aýrýdyń shyǵýyna malǵa mezgilinde ekpe saldyrmaý sebep bolady. Qorany qys mezgiline deıin tazalap, dezınfektsııalaý qajet. Mine, osyndaı jumystar jasalmasa, mal qotyrǵa shaldyǵýy múmkin. Endi aýyrǵan malǵa sharýa qojalyǵynyń ıeleri óz esebinen ekpe saldyrýy kerek. Óıtkeni memleket tarapynan qotyrǵa shaldyqqan maldy emdeýge qoldaý kórsetilmeıdi, - dep málim etti Nurjan Úsenbaev. 

Atyraý oblystyq aýyl sharýashylyǵy jáne jer qatynastary basqarmasynyń basshysy Amangeldi Salamattyń pikirinshe, jergilikti aýa raıynyń jylylyǵy da qotyrdyń shyǵýyna áser etýi múmkin.

– Qotyr Atyraý qalasynyń mańyndaǵy sharýa qojalyqtarynda ǵana anyqtalyp otyr. Qazir basqarmanyń mamandary sharýa qojalyqtarynda tekserýdi, keńes berýdi qolǵa aldy. Aýa raıynyń qolaıly kezeńinde maldy qoraǵa qamamaý qajet. Muny sharýa qojalyǵynyń jetekshileri eskerýi kerek, - deıdi Amangeldi Salamat.

Eske sala ketelik, buǵan deıin Atyraý oblysynda agrarlyq saladaǵy jobalar men túıitkilder týraly jazǵan bolatynbyz.