Atyraýdan Reseı shekarasyna deıin qatynaıtyn joldyń 80 shaqyrymy ashyldy
ATYRAÝ. KAZINFORM – Atyraýdan Reseı Federatsııasynyń shekarasyna deıin qatynaıtyn joldyń 80 shaqyrymy paıdalanýǵa berildi.
«QazAvtoJol» UK» AQ-nyń basqarma tóraǵasy Darhan Imanashevtyń aıtýynsha, bul – , «QazAvtoJol» ulttyq kompanııasy respýblıkalyq mańyzy bar «Atyraý – Reseı Federatsııasynyń shekarasy» baǵytyndaǵy avtomobıl jolynyń 753-833-shaqyrymy. Atalǵan ýchaskedegi qaıta jańartý jumysy aıaqtalǵan.
Atyraý qalasynan Reseı Federatsııasyndaǵy Astrahan oblysynyń shekarasyna deıingi joldyń jalpy uzyndyǵy 277 shaqyrymdy quraıdy. Al, 753-833 shaqyrym aralyǵyndaǵy qaıta jańartý ýchaskesinde qıyrshyq tasty-mastıkalyq asfaltbeton qospasynan jol jabynnyń joǵary qabaty tóselgen.
«Jol boıynda 25 baılanys júıesi tóselip, 13 sý ótkizgish qubyr tóseldi. Mal ótýge arnalǵan 5 jol jasaldy. Túngi mezgilde jaryq beretin 78 tirek jóndeldi. Jol janyna 155 myń syzyqtyq metr torly qorshaý qoıylyp, 435 jol belgisi bekitildi. Tosqaýyl qorshaýynyń 8 myń syzyqtyq metri jóndeldi. Bir sanıtarlyq-gıgıenalyq torap ornatyldy. Tórt demalys orny abattandyrylyp, 26 aýyspa jol jasaldy. Atalǵan jobaǵa 650 maman men 400-ge jýyq arnaıy tehnıka tartyldy», -dep habarlady kompanııanyń baspasóz qyzmeti.
Sondaı-aq, osy kezge deıin 621-833 shaqyrym aralyǵyndaǵy uzyndyǵy 212 shaqyrymdyq ýchaskede 3,4 mln tekshe metr jol tóseminiń qurylysy aıaqtalǵan. Atalǵan ýchaskedegi 212 shaqyrymda negizg, al, 146,8 shaqyrymda qıyrshyq tasty-mastıkalyq asfaltbetonnan joǵary qabaty tóselgen.
«Jańadan salynǵan jol 212 shaqyrymda qolaıly ári qaýipsiz qozǵalys qamtamasyz etildi. Buryn bul ýchaske arqyly jol júrý uzaqtyǵy 5 saǵat edi. Qazir bul joldy 2 saǵatta júrip ótýge bolady. Jobanyń halyqaralyq standarttarǵa sáıkes oryndalýy úshin jergilikti, sonymen birge, Italııa, Túrkııa jáne Ázerbaıjan elderiniń kompanııalary qatysty», -dep málim etti kompanııanyń baspasóz qyzmetinen.
Eske sala ketelik, buǵan deıin bıyl Atyraýdan Reseı shekarasyna deıin qatynaıtyn joldy jańǵyrtý aıaqtalady habarlaǵan edik.
