Atyraý prokýratýrasy memleketke mıllıondaǵan aktıvterdi qaıtardy
ATYRAÝ. KAZINFORM – Atyraý qalasynyń prokýratýrasy memleketke quny 700 mln teńgeden asatyn múlikti qaıtardy. Bul týraly qalalyq prokýratýra habarlady.
Jer qatynastary jáne memlekettik múlikti basqarý salasyndaǵy zańdylyqty taldaý barysynda prokýrorlar senimgerlik basqarýdyń tıimsizdigi faktilerin anyqtady.
Jergilikti atqarýshy organ jeke kásipkerge quny 93,7 mln teńge bolatyn jertóle úı-jaıyn bergen. Kásipkerdiń shart talaptaryn oryndamaǵanyna qaramastan, jergilikti atqarýshy organ uzaq ýaqyt boıy nysandy ýaqytyly alyp qoıý boıynsha sharalar qabyldamaǵan.
Osyǵan baılanysty prokýratýra zańdylyqtyń buzylýyn joıý týraly, sonyń ishinde basqa da osyǵan uqsas jaǵdaılar boıynsha usyný engizdi. Qaraý nátıjeleri boıynsha memleket balansyna jalpy quny 400 mln teńgeden asatyn jyljymaıtyn múlik nysandary qaıtaryldy.
Sonymen qatar jer paıdalaný salasynda tártip ornatý boıynsha sharalar qabyldandy. Atap aıtqanda, prokýrorlyq qadaǵalaý aktisi boıynsha memleket tabysyna uzaq ýaqyt boıy maqsaty boıynsha ıgerilmeı kelgen, jalpy quny 300 mln teńge bolatyn 28 jer ýchaskesi qaıtaryldy.
– Jer qatynastary salasyndaǵy zańdylyqty qamtamasyz etý jáne memlekettik múlikti qorǵaý prokýratýra organdarynyń turaqty baqylaýynda, - delingen habarlamada.
Aıta keteıik, bıyl memleketten zańsyz shyǵarylǵan aktıvterdiń 40 mlrd teńgesi qaıtaryldy.
