Atyraý polıtsııasynyń qyzmetkeri MMA-dan álem chempıony atandy
ATYRAÝ. KAZINFORM – Atyraý polıtsııasynda jumys isteıtin arý Aıda Haırýllına MMA-dan álem chempıony atandy.
Atyraý oblystyq polıtsııa departamentiniń baspasóz qyzmetinen málim etkendeı, álem chempıonaty Indonezııanyń astanasy – Djakarta qalasynda ótken.
– Eresekter arasyndaǵy «Gamma World MMA Championship 2024» álem chempıonatynda Dodaǵa álemniń 66 elinen 920 sportshy baq synady. Sonyń biri – Atyraý oblystyq polıtsııa departamentiniń qyzmetkeri Aıda Haırýllına. Jahan sportshylarynyń dodasynda atyraýlyq polıtseı 72,6 keli salmaqta el namysyn qorǵady, -dep habarlady departamenttiń baspasóz qyzmeti.
Ol 3 kezdesý ótkizgen. Aldymen Kambodja jáne Avstralııa eliniń sportshylarymen kúsh synasyp, sheberligi men fızıkalyq daıyndyǵynyń joǵary ekenin dáleldegen. Al fınalda Egıpet eliniń sportshysyn aıqyn basymdyqpen utqan.
– Bizdiń qyzmetimiz jaýapkershilik pen tabandylyqty talap etedi. Qyzmettik mindetimizdi adal atqarýmen birge sporttyq sheberligimizdi shyńdaýǵa da ýaqyt tabamyz. Sport salasynda jattyqtyrýshylarymnyń, áriptesterimniń, otbasymnyń qoldaýynyń nátıjesinde jetistikke qol sozdym. Álem chempıonatyndaǵy altyn medal – tek meniń ǵana emes, Qazaqstannyń jeńisi. Aldaǵy ýaqytta da elimniń abyroıyn qorǵaýǵa bar kúsh-jigerimdi salamyn, deıdi Aıda Haırýllına.
Polıtsııa leıtenanty Aıda Haırýllına osy kezge deıin qoıan-qoltyq urystan Azııa chempıony, álem kýboginiń eki dúrkin jeńimpazy atanǵan.
Eske sala ketelik, budan buryn Atyraý polıtsııasynda jumys isteıtin arý qoıan-qoltyq urystan Azııa chempıony atanǵanyn jazǵan edik.