Atyraý polıtseıleri turǵyndary evakýatsııalanǵan Taldykól aýylyn baqylaýǵa aldy

ATYRAÝ. KAZINFORM – Atyraý polıtseıleri turǵyndary evakýatsııalanǵan Taldykól aýylyn baqylaýǵa aldy.

Atyraý oblysynyń jedel shtabynan málim etkendeı, Mahambet aýdanyndaǵy Taldykól aýylynyń turǵyndary Atyraý qalasyna evakýatsııalandy. Qazir atalǵan aýylda polıtsııa qyzmetkerleri patrýldik baqylaýdy kúsheıtti.

«Jaıyq ózenindegi sý deńgeıi kóterilip, aǵys qarqynynyń kúsheıýine baılanysty Mahambet aýdanyna qarasty Taldykól aýylyna sý basý qaýpi tóndi. Sol sebepten, turǵyndary tolyq evakýatsııalanǵan aýylda qoǵamdyq qaýipsizdikti polıtsııa qyzmetkerleri qamtamasyz etýdi qolǵa aldy. Aýyldaǵy patrýldik baqylaý júrgizýge 14 polıtsııa qyzmetkeri, 5 patrýldik kólik tartyldy. Patrýldeý jáne kezekshilik táýlik boıy júrgiziledi. Turǵyn úıler men sharýashylyq maqsattaǵy nysandar táýlik boıy kúzetiledi. Maqsat – qaraýsyz qalǵan úıler men nysandarda talan-tarajǵa jol bermeý», - dep habarlady oblystyq jedel shtab.

Eske sala ketelik, keshe Atyraý-Oral trassasynan Taldykól aýylyna baratyn joldy tasqyn sý basqanyn jazǵan bolatynbyz.

Al, keshe Atyraý oblysyndaǵy Taldykól aýylynyń turǵyndary tolyq evakýatsııalanatynyn habarlaǵan edik.