Atyraý-Oral trassasynyń 71-shaqyrymynda jol ústimen sý ótip jatyr

ATYRAÝ. KAZINFORM – Atyraý-Oral trassasynyń 71-shaqyrymynda jol ústimen sý ótip jatyr.

Atyraý oblysy jedel shtabynyń aqparatyna súıensek, joldyń bul tusy Mahambet aýdanynyń aýmaǵymen ótedi. Jol men Jaıyq ózeniniń aralyǵy shamamen 6-7 shaqyrym.

«Mahambet jáne Aqtoǵaı aýyldarynyń aralyǵyndaǵy jol boıyna mol sý jınaldy. Soǵan baılanysty keshki saǵat 21:05-te arnaıy tehnıkalarmen Atyraý-Oral trassasynyń 71-shaqyrymy tusynda jasaqtalǵan bógetti ashý jumysy bastaldy. Jaıylymdyq alqaptaǵy sý batys jaǵyna jiberilip jatyr», - dep habarlady oblystyq jedel shtabtan.

Eske sala ketelik, budan buryn Atyraý-Oral trassasynyń Mahambet aýdanyndaǵy 56-shaqyrymy jyrylǵanyn jazǵan edik.

Sondaı-aq, búgin Atyraý-Oral trassasynyń Mahambet aýdanyndaǵy 44-shaqyrymy jyrylǵanyn habarlaǵan bolatynbyz.