Atyraý-Oral trassasynan Inderge baratyn joldy sý basý qaýpi qaıta tóndi
ATYRAÝ. KAZINFORM – Atyraý-Oral trassasynan Inder aýdanyna baratyn 7 shaqyrymdyq joldy sý basý qaýpi qaıta tóndi. Osyǵan baılanysty atalǵan jol bóligimen júk kólikteriniń qozǵalysyna shekteý qoıyldy.
Inder aýdanynyń jedel shtabynyń aqparatyna qaraǵanda, qaýiptiń kúsheıýine eki sebep áser etip otyr. Birinshiden, Jaıyq ózenindegi sý deńgeıi kóterilip, búgin, 12 mamyrda kúndizgi saǵat 16:00-de 1 035 santımetrge jetken. Bul qaýipti deńgeıden +190 santımetrge kóp. Ekinshiden, búgin aýdan ekpindi jel soǵyp, Inderbor kentine baratyn jolǵa tirelgen sýdyń tolqynyn kúsheıtken.
«Joldyń eki jaǵyna topyraq tógilip, bóget soǵylǵan edi. Biraq, sý asfalttyń astynan ótip, endi betine shyǵyp jatyr. Osyǵan baılanysty Atyraý-Oral trassasynan Inderbor kentine deıin baratyn 7 shaqyrymdyq jolda júk kólikteriniń qozǵalysy toqtatyldy. Qazir jaǵdaı baqylaýǵa alynyp, tıisti jumystardy atqarý áli de jalǵasýda», - dep habarlady aýdandyq jedel shtabtan.
Eske sala ketelik, buǵan deıin Atyraý-Oral trassasynan Inderborǵa baratyn 7 shaqyrym joldy sý basqanyn jazǵan bolatynbyz.