Atyraý - Oral trassasynan Inderborǵa burylatyn 7 shaqyrym joldy tasqyn sý shaıyp ketti

ATYRAÝ. KAZINFORM – Atyraý-Oral trassasynan Inderborǵa burylatyn 7 shaqyrym joldy tasqyn sý shaıyp ketti.

Bul týraly áleýmettik jelide vıdeo tarady. Vıdeony «Jol spasynyń ulttyq ortalyǵy» RMK Atyraý oblystyq fılılaly júktedi.

Inder aýdanynyń ákimi Daryn Shamuratovtyń aıtýynsha, 8 mamyrdan beri atalǵan jol bóliginiń jıegine topyraq tógilip, bóget turǵyzylǵan. Alaıda, Jaıyq ózeninen saı-jyralarǵa shyqqan sýdyń aǵysyn toqtatý múmkin bolmaǵan.

«Búgin, 13 mamyrda saǵat 09.45-te saılarǵa jınalǵan tasqyn sý Inderbor kentine baratyn joldyń 3-5-shaqyrym aralyǵyna shyǵyp ketti. Osy ýchaskede avtokóliktiń barlyq túri úshin qozǵalys toqtatyldy. Oral qalasyna baratyn avtokólik júrgizýshileri úshin Mahambet aýyly arqyly ótetin balama jol bar», - dep habarlady oblystyq jedel shtabtan.

Eske sala ketelik, budan buryn Atyraý-Oral trassasynan Inderge baratyn joldy sý basý qaýpi qaıta tóngenin habarlaǵan edik.