Atyraý-Oral trassasyn qalpyna keltirý áli jalǵasyp jatyr

ATYRAÝ. KAZINFORM – Sý tasqynyna baılanysty Atyraý-Oral trassasynyń jyrylǵan bóligin qalpyna keltirý áli júrgizilip jatyr. Onyń aıaqtalýyna áli 1-2 kún bar. 

«QazAvtoJol» UK» AQ Atyraý oblystyq fılıalynyń basshysy Erken Sheralıevtiń aıtýynsha, respýblıkalyq mańyzy bar avtojoldyń 44-shaqyrymyn qalpyna keltirýdiń 80 paıyzy atqarylǵan.

«Atyraý-Oral avtojolyn qaıta qalpyna keltirý jumysy bir apta buryn bastaldy. Qazir trassanyń atalǵan bóliginiń 10 metrdeı aýmaǵynda qalpyna keltirý jumysy jalǵasyp jatyr. Qalpyna keltirý aıaqtalǵan soń bir mezgilde eki jolaqtan kólik júredi. Jol ýaqytsha qalpyna keltirilip, paıdalanýǵa berilgennen keıin avtojoldan jeńil kólikter ǵana óte alady. Avtokólik quraldarynyń qaýipsiz jáne úzdiksiz júrýin qamtamasyz etý maqsatynda avtojol bir-eki kúnde paıdalanýǵa beriledi», - deıdi Erken Sheralıev.

Onyń aıtýyna qaraǵanda, qazir barlyq ýchaskede táýlik boıy kezekshilik uıymdastyrylǵan.

«Joldyń sý shaıǵan bóligin ýaqytsha qalpyna keltirý jumysyn atqarý úshin 30 adam, 23 tehnıka jumyldyryldy. Osy trassanyń 56-shaqyrymynda joldyń ústinen aǵyp jatqan sýdy toqtatý maqsatynda bógetti ornatý jáne nyǵaıtý qolǵa alyndy», - dedi Erken Sheralıev.

Atyraý-Oral trassasyn qalpyna keltirý jumysyn «QazAvtoJol» UK» AQ-nyń Atyraý oblystyq fılıaly men bas merdiger retinde «Qajservıs» kompanııasy atqaryp jatyr.

Eske sala ketelik, budan buryn Atyraý-Oral trassasynyń Mahambet aýdanyndaǵy 44-shi jáne 56-shaqyrymy jyrylǵanyn jazǵan edik.